ር.ሊ.ጳ ፍራንችስኮስ ፍቅር “ለሰላም መንገድ ይከፍታል እንጂ ሌላውን አያፍንም” ማለታቸው ተገለጸ!

የእዚህ ዝግጅት አርቃቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻን ተከታታዮች ርዕሰ ሊቃነ ጳጳሳት ፍራችስኮስ በወቅቱ ያደረጉትን የቅዱስ ወንጌል አስተንትኖ ሙሉ ይዘቱን እንደሚከተለው አሰናድተነዋል፣ ተከታተሉን። 

የተወደዳችሁ ወንድሞቼ እና እሕቶቼ እንደምን አረፈዳችሁ!

በዚህ ቀን ወላዲተ አምላክ የሆናችሁ የማርያምን በዓል ስናከብር የተሰጠንን አዲስ ጊዜ በእሷ እንክብካቤ ስር እናስቀምጣለን። እርሷ ይህንን አዲስ አመት በእይታዋ ስር ታድርግልን።

የዛሬው ቅዱስ ወንጌል የነገረን የማርያም ታላቅነት አንድ ያልተለመደ ነገር በማድረጓ አይደለም፣ ይልቁንም እረኞቹ የመላእክትን መልእክት ተቀብለው ወደ ቤተ ልሔም ፈጥነው ሄዱ (ሉቃ. 2፡15-16)፣ እርሷ ማለትም ማርያም ዝም አለች። የእናትየው ዝምታ በጣም ቆንጆ ባህሪ ነበር። እርሷ ቃላት ስላጠራት ሳይሆን እግዚአብሔር ለሚሰራው ድንቅ ነገር በመደነቅ እና በአድናቆት የተሞላ ዝምታ ነበር ያሳየችው። “ማርያም ግን ይህን ሁሉ በልቧ ይዛ ታሰላስል ነበር (2፡19)። በዚህ መንገድ ለተወለደው በራሷ ውስጥ ቦታ ታሰናዳለች፣ በዝምታ እና በአምልኮ፣ ኢየሱስን መሃሉ ላይ አስቀመጠችው እና አዳኝ መሆኑን ትመሰክራለች።

ስለዚህም እናት የሆነችው ኢየሱስን በማህፀኗ ተሸክማ ስለወለደችው ብቻ ሳይሆን የእርሱን ቦታ ሳትይዝ ወደ ብርሃን ስላመጣችው ነው። እሷም ከመስቀል በታች፣ ጨለማ በሆነ ሰዓት በፀጥታ ኖራለች፣ እናም ለእርሱ ቦታ መስጠቷን እና እርሱ ለእኛ ፍረያማ እንዲሆን ማድረጓን ትቀጥላለች። የሃያኛው መቶ ክፍለ ዘመን ሃይማኖተኛ እና ገጣሚ እንዲህ ሲል ጽፏል: - "ድንግል, የዝምታ የካቴድራል ዝምታ፣  [...] ሥጋችንን ወደ ገነት ታመጣለች / እና እግዚአብሔር ሥጋ እንዲለብስ ፈቀደች" ይለናል። የዝምታ ካቴድራል፡ ቆንጆ ምስል ነው። በዝምታዋ እና በትህትናዋ፣ ማርያም የእግዚአብሔር የመጀመሪያዋ “ካቴድራል” ናት፣ እሱ እና ሰው የሚገናኙበት ቦታ ሆነች።

ነገር ግን ይህ እናቶቻችንም በድብቅ የሚያደርጉት እንክብካቤ ነው፣ በአሳቢነታቸው ብዙ ጊዜ ድንቅ የዝምታ ካቴድራሎች ናቸው። ወደ ዓለም እኛ እንድንመጣ ያደርጉናል፣ እናም ከዚያም እኛን መንከባከባቸውን  ይቀጥላሉ፣ ብዙ ጊዜ እኛ ሳናስተውል ይህንን ተግባራቸውን ይቀጥላሉ፣ እንድናድግ በከፍተኛ ሁኔታ ይሰራሉ። ይህን እናስታውስ፡ ፍቅር አይታፈንም። ፍቅር ለሌላው ቦታ ይሰጣል። ፍቅር እንድናድግ ያደርገናል።

ወንድሞች እና እህቶች በአዲሱ አመት መጀመሪያ ላይ ወደ ማርያም እንመልከተው እና በአመስጋኝነት ልብ እናቶችንም እናስብ እና እንመልከታቸው፣ ያንን ፍቅር ከምንም በላይ በዝምታ የሚለማውን እንዴት እንደሚያውቅ እርሱ ራሱ ያውቃል። ለሌላው ሰው ቦታ እንስጥ፣ ክብራቸውን እናክብረው፣ ሃሳባቸውን የመግለጽ ነፃነትን እንስጣቸው፣ ማንኛውንም አይነት ይዞታ፣ ጭቆና እና ጥቃትን በመተው ማለት ነው። ዛሬ ለዚህ በጣም ብዙ ፍላጎት አለ ፣ በጣም ብዙ! እርስ በርስ ለመደማመጥ ዝምታ በጣም ያስፈልጋል። የዛሬው የዓለም የሰላም ቀን መልእክት እንደሚያስታውስን “የሰው ልጅ ለራስ ወዳድነት፣ ለግል ጥቅም፣ ለጥቅም ፍላጎት እና ለስልጣን ጥማት ፈተና በሚሸነፍበት ጊዜ ሁሉ ነፃነትና ሰላም አብሮ መኖር አደጋ ላይ ይጥላል። ፍቅር በአንፃሩ መከባበርን ያቀፈ ነው ደግነትን ያቀፈ ነው፡ በዚህ መንገድ መሰናክሎችን በማፍረስ ወንድማማችነትን እንድንኖር፣ የበለጠ ፍትሃዊ፣ ሰዋዊ እና ሰላማዊ ማህበረሰብን እንድንገነባ ይረዳናል።

በአዲሱ ዓመት በዚህ የዋህ፣ ዝምተኛ እና ልባም ፍቅር በሚፈጥር እና በዓለም ላይ የሰላምና የእርቅ ጎዳና እንዲከፈትልን ወደ ወላዲተ አምላክ ማርያም እና እናታችን እንጸልይ።