ር.ሊ.ጳ ፍራንችስኮስ የዘላለም ሕይወት ለመውረስ በእምነት፣ ተስፋ እና ፍቅር መኖር ያስፈልጋል አሉ!

የዚህ ዝግጅት አቅራቢ መብራቱ ኃ/ጊዮርጊስ ቫቲካን

በእለቱ የተነበበው የመጽሐፍ ቅዱስ ቃል

ስለ እናንተ በምንጸልይበት ጊዜ የጌታችንን የኢየሱስ ክርስቶስን አባት እግዚአብሔርን ሁልጊዜ እናመሰግናለን፤ ምክንያቱም በክርስቶስ ኢየሱስ ስላላችሁ እምነትና ለቅዱሳን ሁሉ ስላላችሁ ፍቅር ሰምተናል፤ ይህም የሆነው በሰማይ ተዘጋጅቶ ከተቀመጠላችሁ ተስፋ የተነሣ ነው፤ ስለዚህ ተስፋ በወንጌል የእውነት ቃል አስቀድማችሁ ሰማችሁ (ቆላስያስ 1፡3-5)።

ክቡራት እና ክቡራን የዝግጅቶቻችን ተከታታዮች ርዕሠ ሊቃነ ጳጳሳት ፍራንችስኮስ ረቡዕ ሚያዝያ 16/2016 ዓ.ም ያደረጉትን የጠቅላላ የትምህርተ ክርስቶስ አስተምህሮ ሙሉ ትርጉሙን እንደሚከተለው አሰናድተነዋል፣ ተከታተሉን...

የተወደዳችሁ ወንድሞቼ እና እህቶቼ እንደምን አረፈዳችሁ!

በቅርብ ሳምንታት ውስጥ ማስተዋል (ጥንቃቄ ማድረግ)፣ ፍትህ፣ ጽናት እና ትዕግስት የተመለከቱ መሰረታዊ የሥነ-ምግባር ዐምደ ምግባር የሆኑትን ተመልክተናል። እነዚህ አራት መሰረታዊ የሆኑ የሥነ-ምግባር ዐምደ ምግባራት ናቸው። ደጋግመን እንደገለጽነው፣ እነዚህ አራት መሰረታዊ የሥነ-ምግባር ዐምደ ምግባራት  ከክርስትና እምነት በፊት የነበሩ እጅግ ጥንታዊ ጥበባት ናቸው። ከክርስቶስ ልደት በፊትም ቢሆን ሐቀኝነት እንደ ዜግነት ግዴታ፣ ጥበብ ለድርጊት መመሪያ፣ ጽናት ለበጎ ነገር ለሚመራ ሕይወት እንደ መሠረታዊ ግብአት፣ እና መጠንን ማወቅ እንደ አስፈላጊው መለኪያ ከመጠን በላይ እንዳይጨናነቅ የሚረዱ መሆናቸው ይናገራል። ይህ በጣም ጥንታዊ የሆነው የትውልድ ርስት፣ የሰው ልጅ ርስት በክርስትና አልተተካም፣ ነገር ግን በእምነት ላይ ያተኮረ፣ የተሻሻለ፣ የጠራ እና የተዋሃደ ነው።

ስለዚህ በእያንዳንዱ ወንድና ሴት ልብ ውስጥ መልካሙን የመፈለግ ችሎታ አለ። መንፈስ ቅዱስ የሚሰጠው የተቀበሉት ሰዎች መልካሙን ከክፉ በግልጽ እንዲለዩ፣ ከክፉ በመራቅ ከበጎ ነገር ጋር ለመጣበቅ የሚያስችል ጥንካሬ እንዲኖራቸው፣ እና ይህንንም በማድረግ ራሳቸውን ሙሉ በሙሉ እንዲገነዘቡ ነው።

ነገር ግን ሁላችንም ወደ ሕይወት ሙላት እያደረግን ያለነው፣ የእያንዳንዱ ሰው ዕድል ወደ ሚሆነው - የእያንዳንዱ ሰው ዕጣ ፈንታ ሙላት ነው፣ ሕይወት የተሞላ መሆን - ክርስቲያን ከመንፈስ ቅዱስ፣ ከመንፈስ ልዩ እርዳታ ያገኛል። ይህም ኢየሱስ ነው፥ በአዲስ ኪዳን ጽሁፎች ውስጥ ብዙ ጊዜ በተጠቀሱት በሦስት ሌሎች ልዩ ክርስቲያናዊ በጎነቶች ስጦታ አማካኝነት ተግባራዊ ይሆናል። የክርስቲያን ሕይወትን የሚገልጹት እነዚህ መሠረታዊ ባሕርያት ብዙውን ጊዜ አብረን የምንነጋገራቸው ሦስት በጎነት ናቸው፡- እምነት፣ ተስፋ እና ፍቅር ናቸው።

አንድ ላይ እንበል፡ [አንድ ላይ] እምነት፣ ተስፋ… ምንም አልሰማሁም! ጮክ ብሎ! [በአንድነት] እምነት፣ ተስፋ እና ፍቅር! ጎበዞች!

ብዙም ሳይቆይ የክርስቲያን ጸሐፊዎች “መንፈሳዊ ምግባራ” በጎ ምግባራት ብለው ይጠሯቸዋል፣ ከእግዚአብሔር ጋር በተቀበሉት እና በሚኖሩበት ጊዜ፣ ከሌሎቹ አራቱ ለመለየት ማለትም “መሰረታዊ የሥነ-ምግባር ዐምዶች” ተብለው ከሚጠሩት የመልካም ሕይወት ምግባራት ለመለየት ታስቦ ነው። እነዚህ ሦስቱ በጥምቀት የተቀበልናቸው ከመንፈስ ቅዱስ ነው። አንደኛውና ሌላው፣ ሁለቱም መንፈሳዊ ምግባራት እና መሰረታዊ የሥነ-ምግባር ዐምዶች፣ በብዙ ስልታዊ ነጸብራቅ ውስጥ አንድ ላይ ተሰባስበው፣ ስለዚህ አስደናቂ የሆነ እርስ በእርሳቸው የሚገናኙ ሰባት ትምህርቶችን አዘጋጅተዋል፣ እሱም ብዙውን ጊዜ ከሰባቱ ገዳይ ኃጢአቶች ዝርዝር ጋር ይቃረናሉ። የካቶሊክ ቤተ ክርስቲያን ትምህርተ ክርስቶስ አስተምህሮ መንፈሳዊ ምግባራትን በተመለከተ የሚገልጸው በዚህ መንገድ ነው:- “መንፈሳዊ ምግባራት የክርስቲያናዊው ግብረ ገብ መሠረት ሲሆኑ፣ ሕይወትን ይሰጡታል፥ ባሕሪውን እንዲያገኝ ያስችሉታል። ዘላለማዊ ሕይወት ለመቀዳጀትና እንደ ልጆቹ ሆነው ለመንቀሳቀስ ይችሉ ዘንድ እግዚአብሔር በምዕመናን ነፍስ ውስጥ እንዲሰርጹ አድርጓቸዋል። መንፈስ ቅዱስ በሰብዓዊ ፍጡር አእምሮ ውስጥ የሚገኝና የሚሠራ ስለመሆኑ የቃል ኪዳን ምልክቶች ናቸው። ሦስት መንፈሳዊ ምግባራት አሉ። እነዚህም እምነት፣ ተስፋ እና ፍቅር ናቸው (የክቶሊክ ቤተ ክርስቲያን ትምህርተ ክርስቶስ አስተምህሮ ቁ. 1813)።

መሰረታዊ የሥነ-ምግባር ዐምዶች በዋነኝት የሚያገለግሉት በጎ ተግባራትን ለመሥራት ጀግኖች የሆኑትን ወንዶች እና ሴቶችን ማፍራት ቢሆንም፣ ነገር ግን መንፈሳዊ ምግባራት ደግሞ ተነጥሎ በመንፈስ ቅዱስ ፀጋ መኖርን የምያካትት ነው። ክርስቲያን መቼም ብቻውን አይደለም። መልካም የሚያደርገው በግል ቁርጠኝነት በራሱ ከፍተኛ ኃይል እና ጥረት ሳይሆን፣ እንደ ትሁት ደቀ መዝሙር፣ በጌታ በኢየሱስ ፈለግ ስለሚሄድ ነው። በመንገድ ላይ ወደፊት ይሄዳል። ክርስቲያኑ ለራስ መቻል ትልቅ መድሀኒት የሆኑት መንፈሳዊ ምግባራት አሉት። አንዳንድ ከሥነ ምግባር አኳያ የማይነኩ ወንዶችና ሴቶች በሚያውቋቸው ሰዎች ፊት የትዕቢትና ትምክህተኛ የመሆን አደጋ ያጋጥማቸዋል! ኢየሱስ ደቀ መዛሙርቱን እንዲህ ሲል መክሯቸዋል:- “ስለዚህ እናንተም የታዘዛችሁትን ሁሉ ባደረጋችሁ ጊዜ፣ ‘ከቍጥር የማንገባ አገልጋዮች ነን፤ ልናደርገው የሚገባንን ተግባር ፈጽመናል በሉ”  (ሉቃስ 17፡10) ትዕቢት መርዝ ነው፣ ኃይለኛ መርዝ ነው፡ አንድ ጠብታዋ በመልካምነት የተመሰከረለትን ህይወት ሁሉ ለማበላሸት በቂ ነው። አንድ ሰው ተራራ የሚያክል መልካም ሥራ ሠርቶ፣  ነገር ግን ይህንን ያደረገው ለራሱ ውዳሴ እና ራሱን ከፍ ከፍ ለማድረግ ከሆነ፣ አሁንም ራሱን ጨዋ ሰው ብሎ መጥራት ይችላል? በፍጹም አይችልም!

መልካም ተግባር ፍጻሜ ብቻ ሳይሆን መንገድም ጭምር ነው። መልካምነት ብዙ አስተዋይነት፣ ብዙ ደግነት ይፈልጋል። ከምንም በላይ፣ ጥሩነት ያን አንዳንድ ጊዜ በጣም አስቸጋሪ የሆነውን የኛን ራስ ወዳድነት መንፈስ ማስወገድ ይፈልጋል። የእኛ "እኔ" የሚለው መንፈስ የሁሉም ነገር ማዕከል ሲሆን ሁሉም ነገር ተበላሽቷል። በሕይወታችን ውስጥ የምናደርገውን እያንዳንዱን ተግባር ለራሳችን ብቻ የምናከናውን ከሆነ ይህ መነሳሳት በእርግጥ በጣም አስፈላጊ ነውን? ያ ምስኪኑ "እኔ" የተሰኘው መንፈስ ሁሉንም ነገር ይይዛል እና በዚህም ኩራት ይወለዳል።

አንዳንድ ጊዜ የሚያሰቃዩትን እነዚህን ሁሉ ሁኔታዎች ለማስተካከል መንፈሳዊ ምግባራት ከፍተኛ የሆነ አዎንታዊ አስተዋጾ ያደርጋሉ። በተለይ በውድቀት ጊዜ በጣም ጠቃሚ ናቸው፣ ምክንያቱም ጥሩ ሥነ ምግባር ያላቸው አንዳንድ ጊዜ እንኳን ይወድቃሉ ሁላችንም በሕይወታችን ውስጥ እንወድቃለን ፣ ምክንያቱም ሁላችንም ኃጢአተኞች ነን። በየቀኑ በጎነትን የሚለማመዱ ሰዎች እንኳን አንዳንድ ጊዜ ስህተት እንደሚሠሩ ሁሉ ሁላችንም በህይወታችን ውስጥ ስህተት እንሰራለን፡ ብልህነት ሁል ጊዜ ግልፅ አይደለም፣ ፈቃድ ሁል ጊዜ ጠንካራ አይደለም ፣ ምኞት ሁል ጊዜ አይመራም ፣ ድፍረት ሁል ጊዜ ፍርሃትን አያሸንፍም። ነገር ግን ልባችንን ለመንፈስ ቅዱስ ከከፈትን - የውስጣዊው ሕይወት ጌታ - በውስጣችን ያለውን መንፈሳዊ ምግባራትን ያድሳል፣ ከዚያም በራስ መተማመን ካጣን እግዚአብሔር እንደገና ወደ እምነት መንገዱን ይከፍተናል፣ በመንፈስ ብርታት፣ መተማመናችንን ካጣን፣ እግዚአብሔር ለእምነት መልሶ ይከፍተናል። ተስፋ ብንቆርጥ እግዚአብሔር በእኛ ላይ ተስፋ ያደርገናል፣ ልባችንም ከደነደነ እግዚአብሔር በፍቅሩ ያለሰልሳል። አመሰግናለሁ።