ርዕሰ ሊቃነ ጳጳሳት የፀረ-ሕገወጥ የሰዎች ዝውውር መረብን ለመበጠስ የሰሩትን በሙሉ አመስግነዋል!

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ሐሙስ ግንቦት 15/2016 ዓ.ም ማለዳ ላይ ርዕሰ ሊቃነ ጳጳሳት ፍራንችስኮስ በካቶሊክ ቤተክርስቲያን ደናግላን ለሚመራው ታሊታ ኩም ማሕበር አባላት ባስተላለፉት መልእክት የፀረ-ህገወጥ የሰዎች ዝውውር ዘመቻ አውታረ መረብ መልእክት ልከዋል።

15ኛ ዓመቱን ያስቆጠረው አውታረ መረብ በአሁኑ ወቅት ጠቅላላ ጉባኤውን ከሮም ወጣ ብሎ በማካሄድ ላይ ይገኛል።

ሕገወጥ የሰዎች ዝውውርን ለመከላከል 15 ዓመታት የፈጀ ትግል

ርዕሰ ሊቃነ ጳጳሳት ፍራንችስኮስ ለታሊታ ኩም ሥራ “በጣም አመስጋኝ ነኝ” በማለት መልእክታቸውን ጀመሩ።

እ.ኤ.አ. በ 2009 የተመሰረተ አውታረ መረቡ አሁን ከ 90 በላይ በሆኑ አገሮች ውስጥ እየሰራ ይገኛል።

ርዕሰ ሊቃነ ጳጳሳቱ “በታሊታ ኩም የምትኖሩት ሁሌም የምታደርጉትን መንገድ መቀጠል አለብን፣ ከተጎጂዎች ጎን ቁሙ፣ አዳምጧቸው፣ በእግራቸው እንዲቆሙ እርዷቸው እና በጋራ በህገወጥ የሰዎች ዝውውር ላይ እርምጃ እንዲወስዱ” ጥሪ አቅርበዋል።

ይህ “ቀላል ሥራ አይደለም”፣ ነገር ግን “በእነዚህ 15 ዓመታት ውስጥ በሁሉም ደረጃ ሊደረግ እንደሚችል አሳይተውናል” ሲሉ አክለዋል።

ሕገወጥ የሰዎች ማዘዋወር፡ ‘ሥርዓታዊ’ ክፋት

ሕገወጥ የሰዎች ዝውውር፣ ርዕሰ ሊቃነ ጳጳሳቱ እንዳሉት ከሆነ “ሥርዓታዊ ክፋት” ነው፣ ስለዚህም “ስልታዊ፣ ባለብዙ ደረጃ አቀራረብ”ን ይጠይቃል ያሉ ሲሆን ህገ-ወጥ የሰዎች አዘዋዋሪዎች በግጭት፣ በአየር ንብረት ለውጥ እና በማህበራዊና ኢኮኖሚያዊ ልዩነቶች የሚቀሰቀሱ ሲሆን በተለይም ስደተኞች እና ሴቶች ይጎዳሉ ያሉት ርዕሰ ሊቃነ ጳጳሳቱ ከጀርባው ያሉት የወንጀል ስልቶች "ያለማቋረጥ እየተሻሻሉ ነው" ብለዋል።

ሆኖም “ተስፋ ልንቆርጥ አይገባም” ሲሉ አበክረው ገልጸዋል - “በኢየሱስ ክርስቶስ መንፈስ ኃይል እና በብዙዎች መሰጠት”፣ ጳጳሱ እንዳሉት፣ ሕገወጥ ዝውውርን በማስወገድ ረገድ ስኬታማ መሆን እንችላለን ብለዋል።

ለ 2025-2030 ቅድሚያ የሚሰጣቸው ተግባሮች

የታሊታ ኩም ጠቅላላ ጉባኤ ረቡዕ ግንቦት 14/2016 ዓ.ም የተለቀቀ እና እዚህ የሚገኝ የመጨረሻ ሰነድ አውጥቷል።

እ.አ.አ ከ2025-2030 ጊዜ ውስጥ ለአውታረ መረቡ ሶስት አዳዲስ ቅድሚያ የሚሰጣቸውን ነገሮች ይዘረዝራል፡ 1) ከአዳዲስ ተጋላጭነቶች አንጻር የስርዓት ለውጥን መደገፍ፣ 2) የተረፉትን ያማከለ አቀራረብ፣ እና 3) የድርጅቱን ትብብር እና ሽርክና  ማስፋፋት እንደሆኑም ተገልጿል።

ርዕሠ ሊቃነ ጳጳሳት ፍራንችስኮስ በመልእክታቸው ማጠቃለያ ላይ “ውድ እህቶች እና ወንድሞች፣ በእነዚህ አመታት እንድትሰሩት ላደረጋችሁት ስራ ሁሉ ጌታን በማመስገን ለእናንተ እና ለማህበረሰቦቻችሁ ልባዊ የሆነ ቡራኬዬን አቀርባለሁ” ማለታቸው ተገልጿል።