Касцёл на Залатой Горцы ў Мінску ўключылі ў ахоўную зону
Міністэрства культуры Беларусі зацвердзіла праект ахоўнай зоны, размешчанай у цэнтры Мінска. У раёне перасячэння праспекта Незалежнасці і вуліцы Казлова (ад ЦУМа да Ваенных могілак). Згодна з дакументам, апублікаваным 16 студзеня на Нацыянальным прававым партале, у праект увайшлі каталіцкі храм Найсвяцейшай Тройцы на Залатой Горцы і Вайсковыя могілкі з праваслаўным храмам Аляксандра Неўскага. Гэта азначае, што дадзеныя будынкі нельга зносіць, а тэрыторыю ў межах зоны забаронена забудоўваць.
Рашэнне аб унясенні будынка касцёла ў ахоўную зону вельмі важнае, лічыць пробашч парафіі Найсвяцейшай Тройцы і св. Роха на Залатой Горцы кс. Юрый Санько. У інтэрв’ю Беларускай рэдакцыі Vatican News ён распавёў, што парафіяне даўно чакалі гэтага рашэння, перш за ўсё – дзеля захавання тэрыторыі Залатагорскіх могілак, што месцяцца каля святыні.
“Гэта гарантыя таго, што ўчастак Залатагорскіх могілак не будзе забудаваны – ён перайшоў пад ахову дзяржавы. Што тычыцца нашых планаў па добраўпарадкаванні тэрыторыі вакол касцёла – статус ахоўнай зоны нам не пашкодзіць, бо мы плануем не нейкія грунтоўныя пераўтварэнні, а толькі стварэнне парку, добраўпарадкаванне”, - распавёў святар.
Пробашч адзначыў, што беларускае заканадаўства прадугледжвае магчымасць будаўніцтва на месцы былых могілак культавых аб’ектаў або стварэнне там паркавых зон.
“Гэта вялікая радасць, што Залатагорскія могілкі, якія да канца не разбурылі за савецкім часам, будуць захаваны. І вялікая падзяка, перш за ўсё вернікам, якія шмат маліліся ў гэтай інтэнцыі – каб больш не былі патрывожаныя нашы продкі, пахаваныя на гэтых каталіцкіх могілках. Мы плануем, што гэта будзе месца малітвы, адпачынку, куды можна будзе прыйсці з дзецьмі, знайсці цішыню ў цэнтры вялікага горада, пабыць сам-насам са сваімі думкамі, памаліцца”, - патлумачыў святар.
Нагадаем, зараз працягваецца рэканструкцыя касцёла Найсвяцейшай Тройцы на Залатой Горцы, затым пачнецца добраўпарадкаванне тэрыторыі вакол святыні.
