Евангелізацыя Азіі: новая духоўная семінарыя ў кітайскім Макао
Новая ўстанова, даручаная руху Неакатэхуменальны шлях, будзе непасрэдна падпарадкоўвацца Кангрэгацыі Евангелізацыі Народаў.
Журналіст Андрэа Гальярдучы нагадвае, што яшчэ св. Ян Павел II у сваёй энцыкліцы Redemptoris Missio разглядаў Азію ў якасці месца назначэння для місійнай дзейнасці. Цяпер жа, напярэдадні місійнага месяца ў Каталіцкім Касцёле, якім аб’яўлены кастрычнік 2019 г., калі будзе адзначацца сотая гадавіна першай “місійнай” энцыклікі XX ст. – Maximum Illud Бэнэдыкта XV, Кангрэгацыя Евангелізацыі Народаў аб’явіла аб адкрыцці семінарыі ў Макао.
Ватыканіст італьянскага ACI Stampa спасылаецца на кардынала Фернанда Філоні, прэфекта ўзгаданай Кангрэгацыі, які раней адзначаў, што новая семінарыя “зможа мець асобныя філіялы ў іншых мясцовасцях ці краінах”, а “падрыхтаваныя там кандыдаты да святарства будуць потым суправаджаць жыццё і рост мясцовых каталіцкіх супольнасцей праз рухомую евангелізацыю, у якой святарам будуць дапамагаць цэлыя сем’і, што прайшлі фармацыю ў Неакатэхуменальным шляху.
Выбар Макао ў якасці месца заснавання ўстановы сімвалічны, піша Гальярдучы. У мінулым партугальская калонія, якая набыла статус спецыяльнага адміністрацыйнага рэгіёну Кітая, Макао прэтэндуе на ролю галоўнага аванпорту ў стасунках з Пекінам. З 2018 г. дзейнічае часовая дамоўленасць паміж Святым Пасадам і КНР адносна прызначэння біскупаў. Там паспела сфарміравацца і хрысціянская супольнасць, аб якой трэба клапаціцца і высылаць новых місіянераў.
Дэкрэт аб зацвярджэнні Калегіума Redemptoris Mater для евангелізацыі Азіі быў падпісаны кардыналам-прэфектам Фэрнанда Філоні 29 чэрвеня 2019 г. са згоды і з благаслаўлення папы Францішка.
