Канадскі біскуп: падарожжа стане вялікім выклікам для Папы

Сустрэчы Пантыфіка з прадстаўнікамі розных груп карэнных народаў будуць найважнейшымі падзеямі яго візіту, - заўважыў старшыня епіскапату Канады, біскуп Раймон Пуасон.

Аляксандр Панчанка - Vatican News

Паводле іерарха, два галоўныя месцы, якія адведае Папа, маюць сімвалічнае значэнне: у Эдмантане па-ранейшаму пражывае найбольшая супольнасць карэннага насельніцтва, а таксама на яго тэрыторыі знаходзілася самая вялікая колькасць рэзідэнцыяльных школ у гісторыі Канады. Квэбэк, у сваю чаргу – гэта месца, адкуль бярэ свае вытокі мясцовы Касцёл.

Старшыня канадскага епіскапату заўважыў, што пілігрымка стане сур’ёзным выклікам для Папы, бо яму давядзецца перамяшчацца па вельмі вялікай тэрыторыі. “Гэта будзе каштаваць вялікіх высілкаў Святому Айцу ў яго цяперашняй сітуацыі са здароўем. Нават доўгі пералёт самалётам будзе складаным”, - зазначыў біскуп Пуасон.

Падарожжа Францішка ў Канаду – гэта чарговы канкрэтны крок на шляху да прымірэння, - падкрэсліў іерарх, дадаючы, што візіт будзе мець таксама і евангелізацыйны характар. Па словах біскупа, нягледзячы на тое, што 75% насельніцтва Квэбэку складаюць ахрышчаныя, у касцёл рэгулярна ходзіць толькі 2% католікаў.