Святы Айцец атрымаў у дар капу для літургіі Вялікай суботы
Аляксандр Панчанка – Vatican News
Капа з’яўляецца дарам ад жыхароў “італьянскай радзімы” Папы – горада Асці на поўначы Італіі, які ён адведваў з візітам 19-20 лістапада 2023 года. Менавіта адтуль паходзіць сям’я Хорхэ Марыа Бэрголіа.
Элемент літургічнага святарскага адзення, які яшчэ называецца плювіялам, быў пашыты і аздоблены вышыванымі крыжамі, расліннымі арнаментамі і маленькімі камянямі. Яго выканала мясцовая мастачка Марына Берганцін.
Ініцыятыва падарыць Святому Айцу капу для пасхальнай літургіі належыць ксяндзу Сымонэ Унэрэ, настаяцелю санктуарыя Найсвяцейшай Панны Марыі Брамнай у Асці. У 2024 годзе святар плануе адкрыць майстэрню па пашыве літургічнай вопраткі, у якой змогуць працаваць самотныя пажылыя людзі, інваліды, вязні. Праект рэалізуюцца ў супрацоўніцтве з мясцовым Caritas. Атэлье атрымае назву Nardos, якая нагадвае пра ўрывак з Евангелля святога Яна, дзе апавядаецца як Марыя з Бэтаніі намасціла ногі Езусу чыстым і вельмі каштоўным нардавым алеем.
