Кнігу Бэнэдыкта XVI “перапісалі” для шырокага кола чытачоў
Аляксандр Амяльчэня - Vatican News
У інтэрв’ю аўстрыйскаму каталіцкаму штотыднёвіку Vorarlberger KirchenBlatt ён сказаў: “Новая версія Уводзін у хрысціянства, зацверджаная асабіста Бэнэдыктам XVI перад смерцю, з’яўляецца рэакцыяй на небяспеку таго, што крызіс Каталіцкага Касцёла, які асабліва відавочны ў Германіі цягне ў бездань само хрысціянства”.
Рэдактар папулярнай версіі лічыць, што такая кніга цяпер патрэбна хрысціянам, “якія ўжо не ведаюць, у што яны сапраўды вераць, і атэістам, каб зразумець хрысціянскія асновы еўрапейскага грамадства”.
Уводзіны ў хрысціянства Ёзэфа Ратцынгера, перакладзеная амаль на ўсе мовы свету, “была бліскуча напісанай кнігай маладога тэолага, якая стала сусветным бестселерам, таму што зрабіла хрысціянскую веру зразумелай сучасным людзям”, - заўважыў нямецкі тэолаг, які таксама быў дарадцам Яна Паўла ІІ у Папскай акадэміі жыцця.
Лютц нагадаў, што праца паўстала з цыкла лекцый і была арыентавана на навукоўцаў. Са згоды Папы-эмерыта ён перапрацаваў Уводзіны для больш шырокай аўдыторыі – без навуковага апарату, “тэалагічных тупікоў”, крытычна разгледжаных Ратцынгерам, і замежных слоў, якія было б цяжка зразумець. “Але ўвесь змест кнігі захаваўся. Каб зрабіць яе агульназразумелай, я загадаў свайму цырульніку прачытаць яе крытычна”, - прызнаўся тэолаг.
Рэдактар новай версіі пацвердзіў, што нават “разумныя атэісты” баяцца паступовага “выпарвання” хрысціянства, якое па-ранейшаму з'яўляецца асновай каштоўнасцей заходняга грамадскага ладу. Ён спаслаўся на нямецкага філосафа Юргена Хабермаса, які заклікае “захаваць пераклады” юдэа-хрысціянскай канцэпцыі “вобразу Бога” для абгрунтавання канцэпцыі чалавечай годнасці.
“Многія людзі сёння не ведаюць, што ідэя роўнай годнасці кожнага чалавека заваявала свет толькі дзякуючы хрысціянству”, - звярнуў увагу Лютц. Акрамя таго, хрысціянскім “вынаходствам” стала спачуванне, таму што ў старажытных грэкаў і рымлян не было спачування да слабых.
Лютц падкрэсліў, што Уводзіны ў хрысціянства Ратцынгера не пастарэлі, нягледзячы на тое, што кнізе больш за паўстагоддзя. “Гэты тэкст па-ранейшаму дыхае аптымізмам маладога тэолага неўзабаве пасля ІІ Ватыканскага Сабору, але яго прадказанні цвярозыя і часам чытаюцца сёння так, што дух захоплівае”, - сказаў ён.
“Калі б заўтра атэіст спытаў мяне, што яму варта прачытаць, каб даведацца, што такое хрысціянская вера, я б без ваганняў парэкамендаваў яму Кароткія ўводзіны ў хрысціянства для ўсіх”, - дадаў рэдактар папулярнай версіі кнігі Бэнэдыкта XVI.
