Лаўрэат Прэміі Ратцынгера: казаць пра іслам становіцца ўсё цяжэй
Аляксандр Амяльчэня - Vatiacan News
Даследчык падкрэсліў, што тэрмін ісламафобія сёння выконвае ролю своеасаблівага пудзіла або дымавой завесы, якая павінна перашкаджаць яснаму бачанню рэчаіснасці. Кожнага, хто адважваецца выказаць хоць найменшае пярэчанне супраць ісламу, адразу ж абвінавачваюць у ісламафобіі. Такі ж лёс напаткаў тых, хто не верыць у тое, што Мухамед быў прарокам, а бачыць у ім толькі здольнага палітыка або вайскоўца.
Праблема неапраўданага выкарыстання тэрміна ісламафобія – адна з тэм новай кнігі Sur l'islam прафесара Браге, які, падсумоўваючы свае шматгадовыя даследаванні, хацеў сінтэтычна і даступна расказаць заходняму чытачу, што такое іслам.
У размове з італьянскім парталам La Nuova Bussola Quotidiana французскі філосаф прызнаўся, што адважыўся задумацца над рэдка задаваным пытаннем пра мэту ісламу. Гэта, як адзначыў ён, заваёва ўсяго свету, не абавязкова шляхам гвалту, з мэтай звароту ўсіх падданых.
На пытанне пра розніцу паміж ісламам і ісламізмам прафесар Браге адзначыў, што ў іх па сутнасці адна і тая ж мэта: прымусіць усе народы прызнаць іслам найлепшай з рэлігій, адзінай сапраўднай рэлігіяй, каб усе перайшлі ў яго.
Ісламізм – гэта нецярплівы, бязладны, нязграбны іслам, які хоча паскорыць справу насіллем. Іслам ведае і іншыя формы, якія часова прыстасоўваюцца да заходніх інстытутаў і выкарыстоўваюць еўрапейскія прынцыпы для іх звяржэння. Ісламізм не рацыянальны, таму што ён рызыкуе падняць трывогу. Больш асцярожныя тактыкі, якія выклікаюць менш падазрэнняў і ўмеюць маніпуліраваць людзьмі, больш эфектыўныя ў доўгатэрміновай перспектыве, - лічыць французскі філосаф.
