Тэзэ: Пантыфіку прадставілі новага прыёра
Аляксандр Амяльчэня - Vatican News
Новым настаяцелем Супольнасці стаў брат Мэцью. Афіцыйная перадача паўнамоцтваў адбудзецца 3 снежня 2023 года, у першую нядзелю Адвэнту.
Брат Мэцью родам з Вялікабрытаніі, з'яўляецца англіканінам. Яму 62 гады. Ён далучыўся да Супольнасці ва ўзросце 20 гадоў. Брат Алоіз запэўніў, што абраў яго сваім наступнікам пасля двух гадоў асабістых разважанняў і кансультацый з усімі братамі. На яго думку, змена была неабходная, бо ён сам кіруе супольнасцю ўжо 18 гадоў, з моманту забойства брата Ражэ. Свет і Касцёл мяняюцца, у супольнасці ёсць браты, якія ўжо не ведалі асабіста яе заснавальніка, - падзяліўся брат Алоіз.
Ён прызнаў, што рашэнне аб прызначэнні брата Мэцью яго пераемнікам было прынята яшчэ ў студзені 2023 года. Тым часам ён змог пазнаёміць яго з галоўнымі хрысціянскімі аўтарытэтамі ў свеце.
“Той факт, што наш новы прыёр з’яўляецца англіканінам, паказвае на экуменізм нашай супольнасці і працяг лініі брата Ражэ, які хацеў жыць прымірэннем, апярэджваць прымірэнне хрысціян. Гэты яго экуменізм будзе далей развівацца і весці нашу супольнасць у будучыню. У сакавіку я змог прывесці брата Мэцью на аўдыенцыю, якую штогод дае мне Папа. Гэта стала магчымасцю пазнаёміць яго з Францішкам. Потым мы наведалі і іншых царкоўных кіраўнікоў: Патрыярха Барталамея, архіепіскапа Джасцін Уэлбі ў палацы Ламбет і генеральнага сакратара Сусветнай рады Цэркваў у Жэневе”, - сказаў брат Алоіз.
Брат Мэцью сёлета правёў шмат часу ў Рыме, дзе рыхтаваў экуменічную падзею, якая пройдзе 30 верасня 2023 года на плошчы святога Пятра і будзе папярэднічаць адкрыццю Сінода Біскупаў.
