Барталамей I: народ і экасістэма Украіны нясуць незлічоныя страты
Марыя Валодзіна - Vatican News
Барталамей I выказаў задавальненне ў сувязі з тым, што “людзі канчаткова ўсвядомілі непасрэдную сувязь паміж экалагічнымі і сацыяльнымі праблемамі, асабліва той факт, што разбурэнне прыроднага асяроддзя ў першую чаргу закранае бедных”. “Спалучэнне экалагічнай і сацыяльнай дзейнасці дае надзею на будучыню, таму што ўстойлівае развіццё і прагрэс магчымыя толькі тады, калі мы адначасова клапоцімся аб цэласнасці стварэння і абароне чалавечай годнасці і правоў чалавека”, - гаворыцца ў пасланні.
Чацвёртае пакаленне правоў чалавека
Іерарх нагадаў, што сёння ўсё больш увагі надаецца так званаму "экалагічнаму пашырэнню" правоў чалавека. З'явілася канцэпцыя "чацвёртага пакалення" правоў – экалагічных, якія існуюць разам з індывідуальнымі, палітычнымі, сацыяльнымі і культурнымі правамі. "Барацьба за правы чалавека не можа ігнараваць той факт, што ім пагражаюць змена клімату, недахоп пітной вады, урадлівай глебы і чыстага паветра, а таксама дэградацыя навакольнага асяроддзя ў цэлым", - лічыць Барталамей I, дадаючы, што “з наступствамі экалагічнага крызісу неабходна змагацца перш за ўсё на ўзроўні правоў чалавека”.
Жудаснае экалагічнае спусташэнне Украіны
Менавіта ў гэтым кантэксце неабходна разглядаць і вайну ва Украіне, якая выклікала “жахлівае экалагічнае спусташэнне”. "Кожны акт вайны з'яўляецца таксама і вайной супраць стварэння, паколькі ўяўляе сабой сур'ёзную пагрозу для навакольнага асяроддзя. Забруджванне паветра, вады і зямлі ў выніку бамбардзіровак, рызыка ядзернага Халакоста, выкіды небяспечнай радыяцыі з атамных электрастанцый, канцэрагенны пыл ад узарваных будынкаў, знішчэнне лясоў і знясіленне сельскагаспадарчых зямель — усё гэта сведчыць аб тым, што народ і экасістэма Украіны панеслі і працягваюць несці незлічоныя страты. Мы рашуча паўтараем: вайна павінна неадкладна спыніцца, неабходна распачаць шчыры дыялог”, - гаворыцца ў пасланні.
У літургіі – непадзельнае адзінства паміж чалавекам і стварэннем
Клопат аб прыродным асяроддзі з'яўляецца для хрысціян "не проста дадатковай дзейнасцю", а істотным выразам, працягам Святой Эўхарыстыі ва ўсіх формах і вымярэннях жыцця. Іерарх нагадаў каштоўную спадчыну “піянера экалагічнай тэалогіі”, мітрапаліта Іаана Пергамскага, які пісаў пра Святую Эўхарыстыю як цэласны адказ на экалагічныя праблемы. У літургіі, пісаў ён, “няма антытэзы паміж суб'ектам і рэальнасцю, няма пазіцыі заваявання навакольнага свету чалавечым розумам ”. Святая Камунія – гэта не толькі яднанне з Богам і іншымі людзьмі, але і прыём ежы, прыняцце навакольнай прыроды, а “не простае спажыванне матэрыі”, - гаворыцца ў пасланні Барталамея I.
