Кардынал Олерыш: задача – знайсці каталіцкі тып сінадальнасці
Аляксандр Амяльчэня - Vatican News
Кардынал Жан-Клод Олерыш падкрэсліў гэты асаблівы характар сусветнай касцёльнай асамблеі 4 верасня 2023 года ў Люксембургу падчас сустрэчы з нямецкамоўнымі біскупамі, адказнымі за СМІ, і іх супрацоўнікамі з некалькіх еўрапейскіх краін. Так ён патлумачыў заяву Папы падчас вяртання з Манголіі, згодна з якой прадстаўнікоў СМІ не дапусцяць да ўдзелу ў дэбатах Сінода. Журналісты будуць штодня атрымліваць інфармацыю праз прэс-службу Святога Пасада.
Арцыбіскуп Люксембурга даў абнадзейлівую прамежкавую ацэнку сінадальнага працэсу, які пачаўся ў кастрычніку 2021 года на ўзроўні дыяцэзій ва ўсім свеце. Яго задачай было знайсці “каталіцкі тып сінадальнасці”, у якім агульнае святарства вернікаў было б узгоднена са служэннем Касцёла, калегіяльнасцю біскупаў і прыматам Папы.
Кардынал Олерыш перакананы ў тым, што існуючыя рознагалоссі і напружанасць могуць прывесці да ўзбагачэння Касцёла, які застаецца на агульным шляху ў святле Хрыста.
Іерарх выступіў з выразным заклікам да большай інтэграцыі і адкрытасці. Касцёл павінен арыентавацца на стаўленне Езуса Хрыста, Які сустракаўся з людзьмі адкрыта і асабіста.
“Якім чынам мы, як Касцёл, маглі развіць такую строгасць у многіх маральных пытаннях, якая выключае людзей, хоць Хрыстус ніколі не паступаў такім чынам?” - самакрытычна спытаў кардынал. На яго думку, “недыскрымінацыя як найвышэйшая запаведзь, якой часта патрабавала моладзь, цалкам апраўдана”.
Размова з іерархам была адным з пунктаў двухдзённай сустрэчы ў Люксембургу, на якую прыехалі прадстаўнікі Касцёла з Германіі, Славеніі, Літвы, Люксембурга і Аўстрыі.
