Місіянер у Манголіі: першы выклік – фармацыя мясцовых душпастыраў
Аляксандр Панчанка – Vatican News
Законнік з кангрэгацыі Місіянераў Маці Божай Суцяшэння прыбыў у “дзіцятка Касцёл” у Манголіі ў 2003 годзе і служыць там дзевятнаццаць гадоў. У інтэрв’ю Vatican News ён заўважыў, што на цяперашні дзень у гэтай азіяцкай краіне працуюць 77 місіянераў.
У сучасную эпоху першыя тры каталіцкія святары прыбылі ў Манголію ў 1992 годзе. У гэты перыяд краіна перажывала пераход да дэмакратыі ад камуністычнай дыктатуры, якая пакінула пасля сябе шмат сацыяльных праблем і высокі ўзровень беднасці. Місіянеры распачалі сваю дзейнасць менавіта з клопату пра людзей у патрэбе: былі адкрыты каталіцкія школы, дзіцячыя садкі, цэнтры для моладзі, дабрачынныя структуры.
Па словах айца Віскардзі, Апостальскі прэфект Улан-Батара, кардынал Джорджыа Марэнга, цяпер заахвочвае ставіць у галаву вугла душпастырскую дзейнасць і абвяшчэнне Евангелля, каб усе бачылі, што хрысціянская супольнасць злучана з Панам, а кіруе ёй Святы Дух. “Я думаю, што гэта будзе прыярытэтам на бліжэйшыя гады”, - сказаў італьянскі місіянер.
“Мы шмат працавалі ў сацыяльнай сферы і з’яўляемся добрымі арганізатарамі, як усе місіянеры, але я думаю, што Азія па сваёй прыродзе патрабуе прысутнасці “эскпертаў па Богу”, больш чым вялікіх арганізатараў. Пра гэта кажа таксама папа Францішак”, - дадаў ён.
Нягледзячы на тое, што мангольская каталіцкая супольнасць налічвае ўсяго каля 1500 чалавек, у ёй ужо служаць два мясцовыя святары. Ёсць таксама мясцовыя вернікі, якія актыўна задзейнічаны ў катэхізацыі. “Калі мы хочам збудаваць Касцёл, які будзе разумець Манголію, ён павінен складаецца з манголаў. Такім чынам павінна быць менш місіянераў і больш манголаў”, - перакананы айцец Віскардзі.
