Афрыка: сумесны адказ біскупаў на дэкларацыю Fiducia supplicans

Аляксандр Амяльчэня - Vatican News

Некаторыя біскупскія канферэнцыі афрыканскіх краін раскрытыкавалі дактрынальную дэкларацыю Дыкастэрыі веравучэння аб душпастырскай важнасці благаслаўленняў. Дакумент адкрывае магчымасць бласлаўлення так званых нерэгулярных пар, у тым ліку створаных асобамі аднаго полу. У той жа час у тэксце сцвярджаецца, што дактрына аб сужэнстве не мяняецца, бо благаслаўленне не азначае згоды на такія саюзы.

Сутыкнуўшыся з просьбай аб благаслаўленні двух асоб, нават калі іх стан як пары нерэгулярны, святар можа даць сваю згоду, але пазбягаючы таго, каб гэты жэст душпастырскай блізкасці ўтрымліваў элементы, хоць бы аддалена падобныя на абрад шлюбу.

У дакуменце праводзіцца адрозненне паміж літургічным і спантанным благаслаўленнем, больш падобным на жэст народнай пабожнасці: менавіта да гэтай другой катэгорыі адносіцца магчымасць удзялення благаслаўлення таксама тым, хто не жыве ў адпаведнасці з нормамі хрысціянскай маральнай дактрыны, але пакорліва просіць аб благаслаўленні.

У некаторых афрыканскіх краінах, такіх як Замбія, Камерун і Малаві, біскупы хутка забаранілі святарам удзяляць такога роду благаслаўленне. У лісце да старшынь усіх біскупскіх канферэнцый кантынента ад 20 снежня 2023 года кардынал Амбонга, які ўзначальвае Сімпозіум біскупскіх канферэнцый Афрыкі і Мадагаскара (SECAM), заклікаў іерархаў выпрацаваць сумесны адказ на дэкларацыю Дыкастэрыі веравучэння.