Лагатып Каталіцкага ўніверсітэта Найсвяцейшага Сэрца Езуса

КАСЦЁЛ

Паралін: універсітэт – гэта месца, дзе будучыня наступае раней

Сапраўдная будучыня не наступіць, калі ў поўнай меры не будзем жыць сённяшнім днём, - падкрэсліў кардынал П’етра Паралін, Дзяржаўны сакратар Яго Святасці Папы.

Аляксандр Панчанка - Vatican News

Ёсць месцы, дзе будучыня наступае раней – “адным з іх з’яўляецца ўніверсітэцкі свет, бо там рыхтуюцца заўтрашнія прафесіяналы і праводзяцца даследаванні, плёнамі якіх становяцца вынаходніцтвы, часта вырашальныя для прагрэсу чалавечай сям’і”, - заўважыў бліжэйшы супрацоўнік Святога Айца.

14 красавіка 2024 года іерарх скіраваў пасланне на імя арцыбіскупа Міланскага Марыё Дэльфіні, прымеркаванае да 100-годдзя Дня для Каталіцкага ўніверсітэта Найсвяцейшага Сэрца Езуса (Giornata per l’Univesità Cattolica del Sacro Cuore) – ініцыятывы, якая праводзіцца ў Касцёле ў Італіі з мэтай падтрымкі дзейнасці гэтай важнай навучальнай і даследчай установы з сядзібай у Мілане.

Кардынал Паралін заўважыў, што ў сучасным свеце “нельга заставацца ў палоне мінулага”, але таксама нельга “наіўна і паспешліва скіроўвацца ў заўтрашні дзень”. Неабходна “ўмацоўваць усведамленне таго, што ўсё вырашаецца ў сучаснасці, таму што сапраўднай будучыні не будзе, калі ў поўнай меры не жыць сённяшнім днём”.

Звяртаючыся да мінулага, іерарх нагадаў, што заснавальнікі Каталіцкага ўніверсітэта Найсвяцейшага Сэрца Езуса асэнсоўвалі “вострую неабходнасць ужо ў сучаснасці прапаноўваць маладым людзям найлепшыя ўмовы для будавання будучыні” і таму пажадалі ўстанавіць спецыяльны нацыянальны дзень, прысвечаны салідарнасці з універсітэтам, каб “скіроўваць да яго ўвагу ўсёй касцёльнай супольнасці”.

Дзяржсакратар заўважыў, што ад самага пачатку вернікі ўскладалі вялікія спадзяванні на Каталіцкі ўніверсітэт і аказвалі яму шчодрую падтрымку. Дзякуючы шырокай мабілізацыі і збору вялікай колькасці ахвяраванняў, універсітэт, які яшчэ рабіў свае першы крокі, усяго праз некалькі гадоў пасля свайго заснавання атрымаў дзяржаўнае прызнанне і рэгістрацыю. Сёння гэта ўстанова “ўваходзіць у лік самых важных і прэстыжных універсітэтаў краіны і грае ўсё важнейшую ролю таксама на міжнародным узроўні”, - падкрэсліў кардынал Паралін.