Тыдзень у Беларусі – важнае

Павел Міцкевіч – спецыяльна для Vatican News

Апостальскі нунцый на ўрачыстасці ў гонар галоўнага апекуна Пінскай дыяцэзіі павіншаваў з юбілеямі найстарэйшага іерарха Беларусі. 18 мая 2024 года ў Іванаве арцыбіскуп Антэ Ёзіч узначаліў цэлебрацыю ў гонар святога Андрэя Баболі. Удзел у ёй узялі каталіцкія біскупы Беларусі на чале са старшынёй епіскапату арцыбіскупам Юзафам Станеўскім. Асаблівым чынам была ўзнесена падзяка Богу за 40-годдзе святарства і 25-годдзе біскупскага служэння Казіміра Велікасельца, дапаможнага біскупа Пінскай дыяцэзіі. Гэта найстарэйшы ў Беларусі каталіцкі іерарх, якому споўнілася 79 гадоў.

Арган і капліцу мінскай парафіі благаславіў біскуп Юры Касабуцкі. 16 мая 2024 года Генеральны вікарый Мінска-Магілёўскай архідыяцэзіі ўзначаліў урачыстасць у маладой парафіі Беззаганнага Зачацця Найсвяцейшай Панны Марыі, дзе нясуць служэнне айцы-марыяне. Свята суправаджала музыка ў выкананні галоўнага арганіста і капельмайстара мінскага катэдральнага касцёла Уладзіміра Неўдаха.

У гродзенскай катэдры больш за 70 вернікаў прынялі сакрамэнт канфірмацыі. 16 мая 2024 года сакрамэнт удзяліў біскуп Гродзенскі Аляксандр Кашкевіч. Намашчэнне алеем атрымалі маладыя і старэйшыя вернікі катэдральнай парафіі. Такім чынам яны ўзялі на сябе абавязак быць адважнымі вызнаўцамі сваёй веры і дазволілі запалаць у сабе Божай любові, каб несці Добрую Навіну аб Хрысце іншым людзям, асабліва тым, хто далёка ад Касцёла.

Удзельнікаў 30-х Кірыла-Мяфодзіеўскіх чытанняў прывітаў Мітрапаліт Мінска-Магілёўскі. 16 мая 2024 года старшыня епіскапату, арцыбіскуп Юзаф Станеўскі ўзяў удзел у цырымоніі адкрыцця чытанняў. Мерапрыемства, якое штогод праводзіцца Беларускай праваслаўнай царквой, узначаліў Мітрапаліт Мінскі і Заслаўскі Веніямін. У прывітальным слове арцыбіскуп Станеўскі пажадаў, каб чытанні "выхавалі новых "Мятодаў і Кірылаў", каб радаснае "Хрыстус уваскрос" праз вякі надавала моц у пілігрымцы веры нашым нашчадкам".

Курыя Віцебскай дыяцэзіі заахвоціла да малітвы за зняволеных святароў. 18 мая 2024 года павінен быць вызвалены айцец Павел Лемех, які быў асуджаны на адміністрацыйны арышт у 10 сутак. Айцец Анджэй Юхневіч будзе адбываць зняволенне даўжэй – яму прысудзілі 15 сутак арышту. Паводле камунікату Курыі, абодва святары з парафіі Маці Божай Фацімскай у Шуміліне былі затрыманы праваахоўнымі органамі. Прычына не называецца.

У пілігрымцы з Пінска ў Лагішын прынялі ўдзел звыш 150 вернікаў. 12 мая 2024 года на працягу дня пілігрымы, у тым ліку з Гомеля і іншых гарадоў Пінскай дыяцэзіі, прайшлі амаль 30 кіламетраў да санктуарыя Маці Божай Каралевы Палесся. У Лагішыне пілігрымаў сустрэў кусташ санктуарыя ксёндз Андрэй Шут, святую Імшу цэлебраваў біскуп Пінскі Антоні Дзям'янка пры ўдзеле Апостальскага адміністратара для грэка-католікаў у Беларусі архімандрыта Сяргея Гаека і святароў.

Абрад Тры Каралі ўнесены ў спіс гісторыка-культурных каштоўнасцяў Беларусі. Рэспубліканская навукова-метадычная рада пры Міністэрстве культуры 15 мая 2024 года прыняла рашэнне аб неабходнасці надання статусу гісторыка-культурнай каштоўнасці абраду, які каталіцкія вернікі ладзяць 6 студзеня ў Лідскім і іншых раёнах Гродзенскай вобласці. Таксама ў спіс унесены руіны касцёла Ўнебаўзяцця Найсвяцейшай Панны Марыі ў вёсцы Дубрава Маладзечанскага раёна.

Падрыхтавана паводле grodnensis.by, catholicnews.by, catholic.by і ўласнай інфармацыі.