КАСЦЁЛ

Тыдзень у Беларусі – важнае

Працэсіі Божага Цела, пачатак навэнны, Дзень дзіцяці – агляд найбольш значных падзей, якія адбыліся ў Каталіцкім касцёле ў Беларусі на гэтым тыдні, падрыхтавала Беларуская рэдакцыя Vatican News. Прапануем вашай увазе самае важнае з жыцця беларускіх католікаў.

Павел Міцкевіч – спецыяльна для Vatican News

Масавыя працэсіі Божага Цела адбыліся на Гродзеншчыне. 30 мая 2024 года вернікі прайшлі вуліцамі сваіх населеных пунктаў. У Гродне Эўхарыстычная працэсія рушыла да чатырох алтароў на чале з біскупам Гродзенскім Аляксандрам Кашкевічам і каад’ютар дыяцэзіі біскупам Уладзімірам Гуляем ў суправаджэнні аркестру і хору. Евангелле чыталася на беларускай, рускай, польскай, літоўскай і англійскай мовах. У іншых абласных цэнтрах і ў Мінску Эўхарыстычныя працэсіі запланаваны на 2 чэрвеня.

Вернікі архідыяцэзіі распачалі навэнну перад інтранізацыяй Найсвяцейшага Сэрца Езуса. Гэту малітву ў інтэнцыі ўміласціўлення і перапрашэння пачалі чытаць 29 мая 2024 года ў парафіях і сем’ях. Па ініцыятыве і распараджэнні Мітрапаліта Мінска-Магілёўскага арцыбіскупа Юзафа Станеўскага праводзіцца малітоўная падрыхтоўка да прысвячэння архідыяцэзіі і ўсяго Каталіцкага Касцёла ў Беларусі Найсвяцейшаму Сэрцу Езуса, а таксама Год падзякі Маці Божай за Яе апеку і атрыманыя ласкі. Інтранізацыя пройдзе 7 чэрвеня.

Дні дзіцяці праходзяць у Будславе і Гродне. 1 чэрвеня 2024 года ў Нацыянальны санктуарый на святкаванне Сусветнага дня дзіцяці з удзелам Мітрапаліта Мінска-Магілёўскага арцыбіскупа Юзафа Станеўскага запрасілі маленькіх вернікаў з усіх дыяцэзій Беларусі. У Гродне X Дыяцэзіяльны дзень дзіцяці, які ладзяць пад дэвізам З малітвай праз жыццё, праходзіць з удзелам біскупа Аляксандра Кашкевіча.

У Мікелеўшчыне развіталіся з памерлым ксяндзом Рышардам Якубцам. 27 мая 2024 года на пахавальнай Імшы ў гэтай парафіі Мастоўскага дэканату, дзе спачылы шмат гадоў служыў пробашчам, сабралося звыш 100 святароў з усіх дыяцэзій Беларусі. Імшу ўзначаліў дапаможны біскуп Пінскай дыяцэзіі Казімір Велікаселец пры ўдзеле іншых прадстаўнікоў епіскапату.

У Сапоцкіне адзначылі 30-годдзе гродзенскага Caritas. 24 мая 2024 года з нагоды юбілею афіцыйнай дзяржаўнай рэгістрацыі гэтай каталіцкай дабрачыннай місіі, Эўхарыстыю цэлебраваў арцыбіскуп эмерыт Тадэвуш Кандрусевіч. Ён стаяў ля вытокаў аднаўлення дабрачыннай дзейнасці Касцёла ў Беларусі. Імша сабрала таксама іншых прадстаўнікоў епіскапату, святароў, законных сясцёр, супрацоўнікаў нацыянальнага і дыяцэзіяльных Caritas.

Падрыхтавана паводле grodnensis.by, catholic.by і ўласнай інфармацыі.