Касцёл

Тыдзень у Беларусі – важнае

Прысвячэнне парафій, благаслаўленне дзяцей, асвячэнне касцёла – агляд найбольш значных падзей, якія адбыліся ў Каталіцкім касцёле ў Беларусі на гэтым тыдні, падрыхтавала Беларуская рэдакцыя Vatican News. Прапануем вашай увазе самае важнае з жыцця беларускіх католікаў.

Павел Міцкевіч – спецыяльна для Vatican News

Адбылося прысвячэнне ўсіх парафій архідыяцэзіі Найсвяцейшаму Сэрцу Езуса. 7 чэрвеня 2024 года па распараджэнні Мітрапаліта Мінска-Магілёўскага арцыбіскупа Юзафа Станеўскага ў касцёлах прайшлі спецыяльныя набажэнствы прысвячэння парафіі Найсвяцейшаму Сэрцу Езуса – у межах духоўнай падрыхтоўкі да прысвячэння Мінска-Магілёўскай Мітраполіі і ўсіх вернікаў Касцёла ў Беларусі Найсвяцейшаму Сэрцу Езуса.

Гродзенскія біскупы благаславілі ўдзельнікаў Дыяцэзіяльнага дня дзіцяці на час канікул. 1 чэрвеня 2024 года літургію у інтэнцыі ўсіх дзяцей дыяцэзіі цэлебраваў біскуп Гродзенскі Аляксандр Кашкевіч, а каад’ютар дыяцэзіі біскуп Уладзімір Гуляй ахвяраваў Імшу ў інтэнцыі арганізатараў, валанцёраў і дабрадзеяў Дня дзіцяці. Ардынарый пажадаў дзецям правесці канікулы з карысцю і не змарнаваць ласкі, якую дае Бог. Іерархі ўдзялілі дзецям пастырскае благаслаўленне на час летняга адпачынку.

Арцыбіскуп Станеўскі ўпершыню як Мітрапаліт Мінска-Магілёўскі здзейсніў пасвячэнне касцёла. 8 чэрвеня 2024 года ў Беразіно арцыпастыр узначаліў урачыстасць у парафіі Маці Божай Міласэрнасці. Будаўніцтва новага касцёла працягвалася шэсць гадоў – святыня паўстала ў гістарычным цэнтры горада. Каталіцкая парафія ў Беразіне існуе з XVII стагоддзя, аднак пасля таго, як у пачатку XX стагоддзя касцёл згарэў, больш за сто гадоў была без святыні.

У Тракелях праходзіць сустрэча першакамунійных дзяцей. 8 чэрвеня 2024 года дыяцэзіяльны санктуарый Каралевы нашых сем’яў запрасіў на сустрэчу дзяцей, якія сёлета прыступілі да Першай Камуніі, – каб падзякаваць за гэты дар, прасіць аб святасці і ўзрастанні ў Божай ласцы. У раскладзе – малітоўная і забаўляльная праграма, актыўныя гульні, танцы, пачастунак.

Рух Сужэнскія сустрэчы святкуе 20-годдзе сваёй дзейнасці ў Беларусі. Падчас святкавання 8 чэрвеня 2024 года ў сталічнай парафіі святога Францішка Асізскага ўдзельнікі разам шукаюць дабро ў адносінах у сем’ях і супольнасцях. Святую Імшу ўзначаліць Генеральны вікарый архідыяцэзіі біскуп Юрый Касабуцкі. За 20 гадоў праз уікенды Сужэнскіх сустрэч адшукалі надзею некалькі соцень сужэнстваў і некалькі дзясяткаў кансэкраваных асобаў.

Колішнія аднакурснікі Гродзенскай духоўнай семінарыі сустрэліся ў Задарожжы. 4 чэрвеня 2024 года ў мясцовым касцёле прайшла сустрэча святароў, якія 27 год таму распачалі падарожжа да святарства. Святую Імшу ўзначаліў біскуп Віцебскі Алег Буткевіч. Нагодай для сустрэчы менавіта ў Задарожжы ў Віцебскай дыяцэзіі стала 50-годдзе пробашча парафіі ксяндза Эдварда Нарадоўскага, які з’яўляецца адным са святароў з гэтай групы.

Падрыхтавана паводле grodnensis.by, catholicnews.by, catholic.by і ўласнай інфармацыі.