Тыдзень у Беларусі – важнае

Павел Міцкевіч – спецыяльна для Vatican News

Біскуп Гродзенскі ўдзяліў святарскае пасвячэнне. 8 чэрвеня 2024 года сакрамэнт пасвячэння ў прэзбітэры ў Азёрах прыняў дыякан Дзмітрый Дубай з Кангрэгацыі місіянераў клярэтынаў. Пасвячэнне маладому законніку, які паходзіць з парафіі ў Ізабэліне, удзяліў ардынарый Аляксандр Кашкевіч. Назаўтра новапрэзбітэр цэлебраваў прыміцыйную Імшу ў роднай парафіі.

Арцыбіскуп Юзаф Станеўскі наведаў вёску, дзе ў вайну быў створаны абраз Сэрца Езуса. 9 чэрвеня 2024 года Мітрапаліт Мінска-Магілёўскі маліўся з вернікамі Васілеўшчыны — вёскі ў будслаўскай парафіі. Менавіта тут быў створаны абраз, перад якім падчас сёлетняга Будслаўскага фэсту адбудзецца прысвячэнне Касцёла ў Беларусі Найсвяцейшаму Сэрцу Езуса. Арцыпастыр узначаліў цэлебрацыю святой Імшы на палявым алтары і ў гаміліі засяродзіў увагу на Божай любові.

Пілігрымка да нядзейнага касцёла ў Рагачове сабрала рэкордную колькасць удзельнікаў. Паломніцтва са Жлобіна 8 чэрвеня 2024 года згуртавала звыш 70 чалавек, удвая больш, чым у мінулыя гады, – вернікаў са жлобінскай парафіі, а таксама з Мінска, Гомеля, Светлагорска і Нароўлі. У Рагачове іх прывітаў дапаможны біскуп Пінскай дыяцэзіі Казімір Велікаселец. Касцёл святога Антонія Падуанскага ў Рагачове ўжо працяглы час спрабуюць аднавіць. Ён дзейнічаў да 30-х гадоў мінулага стагоддзя, затым святыню закрыла камуністычная ўлада.

У гродзенскай семінарыі адзначылі заканчэнне навучальнага года. 8 чэрвеня 2024 года ў святой Імшы з гэтай нагоды ўдзельнічалі біскуп Гродзенскі Аляксандр Кашкевіч і каад’ютар дыяцэзіі біскуп Уладзімір Гуляй, выкладчыкі і выхаваўцы. У гаміліі Генеральны вікарый дыяцэзіі падкрэсліў, што семінарыя не мае задачы большай, чым падрыхтоўка да евангелізацыйнага служэння ў свеце. Ён заклікаў семінарыстаў на канікулах "не згубіць Езуса, шукаць Яго, слухаць, радавацца ў Ім".

Парафія закрытага Чырвонага касцёла ў Мінску заклікала прасіць заступніцтва ў вяртанні святыні Слугу Божага Эдварда Вайніловіча. Да малітвы запрасілі вернікаў з нагоды 96-ай гадавіна смерці фундатара касцёла Святога Сымона і Святой Алены. Тым часам Ўпаўнаважаны па справах рэлігій і нацыянальнасцяў Аляксандр Румак 13 чэрвеня 2024 года патлумачыў прычыну дагэтуль не распачатай у святыні рэстараўрацыі, якую запланавалі ўлады. Паводле яго, з'явіліся заўвагі па праекце работ, таму ён адпраўлены на дапрацоўку.

У Верхнядзвінску ўшанавалі памяць бласлаўлёнага ксяндза Мечыслава Багаткевіча. Гэты мучанік Другой сусветнай вайны – былы пробашч мясцовай парафіі. Сёлета спаўняецца 120 год з дня яго нараджэння. Святая Імша адбылася 12 чэрвеня 2024 года, калі Касцёл узгадвае 108 бласлаўлёных мучанікаў, ахвяраў вайны. "Першы раз у гісторыі Віцебскай дыяцэзіі так урачыста святкуецца ўспамін бласлаўлёных святароў – марыянаў Антонія Ляшчэвіча і Юрыя Кашыры з Росіцы, Мечыслава Багаткевіча, Станіслава Пыртака і Уладзіслава Мацьковяка – мучанікаў з Беразвечча. Дзякую Богу за тое, што Верхнядзвінск распачынае гэтую традыцыю", – адзначыў пробашч парафіі ксёндз Аляксандр Грыцкевіч.

Агульнабеларуская сустрэча Рыцарства Беззаганнай прайшла ў Івянцы. 8 чэрвеня 2024 года тут сабраліся ўдзельнікі гэтага руху з Віцебскай і Гродзенскай дыяцэзіі, Мінска-Магілёўскай архідыяцэзіі. Праграма была насычанай не толькі ў рэлігійным, але і ў культурным, адукацыйным плане. Святую Імшу цэлебраваў айцец Яўген Голуб з Івянца. Падчас Літургіі адбыўся абрад ўрачыстага ўступлення ў Рыцарства Беззаганнай новых кандыдатаў.

Падрыхтавана паводле grodnensis.by, catholicnews.by, catholic.by і ўласнай інфармацыі.