Касцёл

Тыдзень у Беларусі – важнае

Першая Юбілейная святыня, урачыстасці ў Тракелях, малітва за спачылых святароў – агляд найбольш значных падзей, якія адбыліся ў Каталіцкім касцёле ў Беларусі на гэтым тыдні, падрыхтавала Беларуская рэдакцыя Vatican News. Прапануем вашай увазе самае важнае з жыцця беларускіх католікаў.

Павел Міцкевіч – спецыяльна для Vatican News

На ўрачыстасцях у Тракелях сабраліся пілігрымы з Гродзеншчыны. 12-14 ліпеня 2024 года ў санктуарыі Каралевы нашых сем’яў праходзяць адпустовыя ўрачыстасці дыяцэзіяльнага характару. Вернікі святкуюць 15-годдзе каранавання цудадзейнага тракельскага абраза. У санктуарый прыбылі пешыя пілігрымкі з Гродна, Навагрудка і Іўеўскага дэканату. Галоўнымі падзеямі ўрачыстасцяў стануць, між іншым, начная працэсія, святая Імша з удзелам святароў-юбіляраў і законных сясцёр, аднаўленне сужэнскіх абяцанняў, святая Імша падзякі.

Будслаўская базыліка прызначана першай у Беларусі Юбілейнай святыняй 2025 Святога года. Адпаведны дэкрэт абвясціў 6 ліпеня 2024 года падчас Будслаўскага фэсту Мітрапаліт Мінска-Магілёўскі арцыбіскуп Юзаф Станеўскі. Іерарх зачытаў дакумент аб гэтым прызначэнні на заканчэнне святой Імшы, цэлебрацыю якой узначаліў Апостальскі нунцый арцыбіскуп Антэ Ёзіч разам з усімі каталіцкімі біскупамі Беларусі. З 31 снежня 2024 года да 1 студзеня 2026 года кожны вернік, які наведае гэтую Юбілейную святыню, зможа атрымаць поўны адпуст на звычайных умовах.

За спачылых святароў памаліліся ў Ракаве і Ваўкавыску. 10 ліпеня 2024 года святую Імшу з нагоды 25-годдзя прэзбітэрскага пасвячэння памерлага ксяндза каноніка Дзмітрыя Барылы, шматгадовага ракаўскага пробашча, узначаліў Мітрапаліт Мінска-Магілёўскі арцыбіскуп Юзаф Станеўскі. А 9 ліпеня 2024 года ў Ваўкавыску адбылася Эўхарыстыя ў інтэнцыі ксяндза Антонія Філіпчыка ў першую гадавіну яго смерці. На Імшы, якую ўзначаліў біскуп Гродзенскі Аляксандр Кашкевіч, сабралося шмат святароў, якія былі знаёмыя са спачылым і якім яго прыклад дапамагаў узрастаць у пакліканні. Сярод іх – каад’ютар Гродзенскай дыяцэзіі біскуп Уладзімір Гуляй.

Турнір па міні-футболе сярод міністрантаў прайшоў у Віцебскай дыяцэзіі. 11 ліпеня 2024 года з нагоды 25-годдзя дыяцэзіі на адкрытым турніры ў Мёрах удзельнічалі каманды з Віцебскай, Гродзенскай дыяцэзіі і Мінска-Магілёўскай архідыяцэзіі. Біскуп Віцебскі Алег Буткевіч благаславіў спартсменаў, а пасля ўручыў ім узнагароды. Бронзавыя медалі заваявала каманда з парафіі Найсвяцейшай Тройцы ў Гервятах, срэбраныя – з парафіі святога Казіміра ў Маладзечне. Залатыя медалі і кубак турніру атрымалі гаспадары — каманда з парафіі Унебаўзяцця Найсвяцейшай Панны Марыі ў Мёрах. Ініцыяваў спаборніцтвы ксёндз Алег Зямчонак.

Мінскі Caritas падтрымаў жанчын, якія сталі мамамі ў свята Маці Божай Будслаўскай. У радзільным доме Мінскай вобласці дырэктар дабрачыннай місіі брат Анатоль Ярошка ўручыў падарункі жанчынам, у якіх нарадзіліся дзеці 2 ліпеня, ва ўрачыстасць Найсвяцейшай Панны Марыі Будслаўскай, Апякункі архідыяцэзіі. Падтрымка наборамі для немаўлят стала магчымай дзякуючы сацыяльнаму праекту Good start дабрачыннага каталіцкага таварыства.

Падрыхтавана паводле grodnensis.by, catholicnews.by, catholic.by і ўласнай інфармацыі.