Касцёл

Тыдзень у Беларусі – важнае

Рэкалекцыі пакаяння, юбілей парафіі, пленэр, пілігрымка, футбол – агляд найбольш значных падзей, якія адбыліся ў Каталіцкім касцёле ў Беларусі на гэтым тыдні, падрыхтавала Беларуская рэдакцыя Vatican News. Прапануем вашай увазе самае важнае з жыцця беларускіх католікаў.

Павел Міцкевіч – спецыяльна для Vatican News

У Навагрудку праходзяць рэкалекцыі пакаяння за Беларусь. З 30 жніўня па 1 верасня 2024 года ў касцёле святога Арханёла Міхала сабраліся свецкія вернікі, духавенства, кансэкраваныя асобы. У праграме рэкалекцый – ўсяночныя адарацыі, канферэнцыі, пілігрымка пакаяння ва Уселюб да Маці Божай Новага Жыцця, Крыжовы шлях і іншыя набажэнствы. Удзельнікам прапанавалі здзяйсняць у час рэкалекцый пост на вадзе або на вадзе і хлебе.

Беларускія вернікі ў Вільні зладзілі парафіяльны фэст. 25 жніўня 2024 года на свята супольнасці беларускіх католікаў пры касцёле святога Барталамея запрасілі беларускую праваслаўную супольнасць Канстанцінопальскага Патрыярхату ў Вільні, а таксама гасцей з Беларусі. Падчас святой Імшы касцёл быў запоўнены вернікамі, а пасля Эўхарыстыі зладзілі сумесны пікнік.

У Лядску з удзелам іерархаў адзначылі 600-гадовы юбілей парафіі. 24 жніўня 2024 года ўрачыстасць юбілею парафіі святога Станіслава, біскупа і мучаніка пачалася тэатралізаваным прадстаўленнем, заснаваным на фактах з гісторыі парафіі, якое падрыхтавалі дзеці. Цэлебрацыю святой Імшы ўзначаліў біскуп Гродзенскі Аляксандр Кашкевіч разам з каад’ютарам біскупам Уладзімірам Гуляем, генеральным вікарыем Мінска-Магілёўскай архідыяцэзіі біскупам Юрыем Касабуцкім, Апостальскім адміністратарам для грэка-католікаў у Беларусі архімандрытам Сяргеем Гаекам.

Мастацкі пленэр адбыўся ў Друі. 25 жніўня 2024 года ў кляштары пры касцёле зладзілі выставу работ васьмі мастакоў, якія ўдзельнічалі ў сёлетнім пленэры, мэта якога – наладжванне дыялогу паміж рэлігіяй і мастацтвам. Цяперашні пробашч парафіі ксёндз Вячаслаў Адамовіч працягнуў гэтую ініцыятыву былога пробашча ксяндза Сяргея Сурыновіча, які штогод арганізоўваў у Друі мастацкія пленэры, пачынаючы з 2015 года.

Велапілігрымку ў Бялынічы здзейснілі вернікі з Гродна. Група на чале з сястрой Марленай з Шанштацкага Інстытуту Сясцёр Марыі ў індывідуальным парадку пілігрымавалі на роварах ад гродзенскай катэдры ў парафію Маці Божай Бялыніцкай. Працягласць шляху склала каля 500 кіламетраў. Ля цудадзейнага абраза Найсвяцейшай Панны Марыі ў Бялынічах гродзенскія вернікі склалі інтэнцыі – свае і тых людзей, якія прасілі аб малітве.

У Слоніме прайшоў XX турнір па міні-футболе памяці святога Яна Паўла II. 26 жніўня 2024 года ў спаборніцтвах узялі ўдзел 20 каманд з парафій з усіх дыяцэзій Беларусі, а агульная колькасць удзельнікаў перавысіла паўтары сотні. Пераможцаў вызначылі ў трох катэгорыях, у кожнай камандзе былі вызначаны лепшыя гульцы, якія таксама атрымалі ўзнагароды ад спонсара.

Падрыхтавана паводле grodnensis.by, catholic.by і ўласнай інфармацыі.