Армянскі Патрыярх з Лівана: народы прагнуць жыць у міры
Аляксандр Панчанка - Vatican News
Прадстаяцель Армянскай Каталіцкай Царквы, сядзіба якога знаходзіцца ў Бейруце, нагадаў, што сітуацыя ў Ліване застаецца крайне цяжкай. “Больш няма ні сацыяльнай, ні эканамічнай, а цяпер яшчэ і знешняй бяспекі. Калі мы выходзім з дому, то не ведаем, ці вернемся назад”, - дадаў ён.
На працягу апошніх гадоў Ліван перажывае глыбокі палітычны і эканамічны крызіс. Два дні таму ў краіне цалкам знікла электраэнергія. Ізраіль рэгулярна наносіць удары па аб’ектах Хезбалы на поўдні дзяржавы.
Патрыярх параўнаў падзеі ў Палесціне з драмай, перажытай армянамі на пачатку ХХ стагоддзя. “Усе бачылі, што адбываецца, але ніхто нічога не зрабіў, і мы згубілі больш за паўтара мільёна армянскіх хрысціянскіх мучанікаў”, - з сумам падкрэсліў ён.
Каментуючы ўзаемныя абвінавачванні Ізраіля і ХАМАС у зрыве перамоў у Катары, пастыр армянскіх католікаў адзначыў супярэчанне паміж заявамі і фактамі. “Усе гавораць, што гатовы да перамір’я, але ў той жа час усе ўзмоцнена ўзбройваюцца. Мы глядзім і не можам зразумець, чаму верыць – словам, якія яны кажуць, ці фактам, якія мы потым бачым”, - дадаў іерарх.
Архіепіскап заўважыў, што “вайна паказвае толькі адно: слабасць чалавечага менталітэту, нашу няздольнасць абмяркоўваць, размаўляць з іншымі, каб знайсці шлях, які дазволіць дасягнуць прымірэння, справядлівасці і павагі да чалавечнасці”. Ён падкрэсліў, што вайна – гэта чын супраць Бога, бо ніхто не з’яўляецца гаспадаром жыцця іншых людзей.
“Мой заклік вельмі просты: давайце імкнуцца да таго, каб даць кожнаму права жыць у міры, годным чалавецтва. Гэта просты заклік, які ўздымаюць народы. Мы не хочам вайны і просім лідараў знайсці рашэнні, якія былі б добрымі для ўсіх бакоў”, - адзначыў Патрыярх Кілікійскі, усклікаючы да сумлення палітычных дзеячаў краін.
