Дні святога Яна Паўла II у папскіх універсітэтах Рыма
Аляксандр Амяльчэня - Vatican News
Праект быў распрацаваны Ватыканскім фондам Яна Паўла II, Папскім універсітэтам Яна Паўла II у Кракаве і Касцёлам і шпіталем святога Станіслава ў Рыме пад патранатам Дыкастэрыі па культуры і адукацыі.
"Сённяшняя моладзь не мела магчымасці асабіста пазнаць яго асобу і тое, як ён прамаўляў. Яны не адчулі тых эмоцый, якія суправаджалі нас, калі ён быў сярод нас", - падкрэсліў ксёндз Павел Пташнік, старшыня Ватыканскага фонду Яна Паўла II.
"Дні святога Яна Паўла II з'яўляюцца яшчэ адной нагодай для сумеснага разважання над яго спадчынай, паглыблення і адаптацыі да сучаснасці", - адзначыла сястра Мэры Анжэла Вулкерс з Бюро па сувязях з грамадскасцю Папскага ўніверсітэта святога Тамаша Аквінскага.
Праграма мерапрыемстваў ахоплівае тры папскія ўніверсітэты і ўключае канферэнцыі на англійскай і італьянскай мовах. Сярод тэм – дыялог навукі і веры, культура як агульнае дабро кожнага народа, а таксама асэнсаванне энцыклікі Fides et ratio праз 25 гадоў пасля яе публікацыі.
Сярод выбітных дакладчыкаў – прафесар Рычард Суінберн з Оксфардскага ўніверсітэта, лаўрэат Прэміі Ратцынгера, прафесар Ханна-Барбара Герл-Фалкавіц, былая прэм'ер-міністр Польшчы Ханна Сухоцкая і былы прэс-сакратар Святога Пасада, ксёндз Федэрыка Ламбардзі.
