Святы Айцец благаславіў эўхарыстычны кангрэс у Руандзе
Аляксандр Амяльчэня - Vatican News
Пасланне было падпісана кардыналам-дзяржсакратаром П'етра Паралінам і адрасавана біскупу Вінсэнту Хараліману, дэлегату Канферэнцыі Каталіцкіх Біскупаў Руанды па эўхарыстычных кангрэсах.
"Святы Айцец дзякуе Пану за гэтую важную падзею ў касцельным жыцці, засяроджаную на Эўхарыстыі, якая з'яўляецца цэнтрам усяго хрысціянскага жыцця і сакрамэнтам любові Хрыста да чалавецтва", - адзначаецца ў пасланні.
Кангрэс адбываецца ў асаблівы перыяд для Касцёла ў Руандзе, паколькі краіна рыхтуецца да святкавання 125-годдзя евангелізацыі і Юбілейнага 2025 года. У гэтым кантэксце разважанні над Эўхарыстыяй набываюць асаблівае значэнне.
"Мы павінны быць адчувальнымі знакамі надзеі для многіх братоў і сясцёр, якія жывуць у складаных умовах", - цытуе кардынал Паралін булу абвяшчэння Святога 2025 года Spes non confundit.
Тэма кангрэса Скіруем позірк на Езуса ў сакрамэнце Эўхарыстыі: крыніца надзеі, братэрства і міру заклікае ўдзельнікаў звярнуць увагу на розныя формы голаду ў сучасным свеце: фізічны голад, голад па свабодзе і годнасці, голад па міры і любові, па сэнсе жыцця.
"Жыць Эўхарыстыяй азначае ахвяраваць сябе дзеля іншых і працаваць салідарна з усімі людзьмі добрай волі дзеля пабудовы цывілізацыі любові", - падкрэсліваецца ў пасланні.
У заключнай частцы Папа Францішак даверыў усіх удзельнікаў кангрэса мацярынскай апецы Марыі, Каралевы Міру і Маці Надзеі, заклікаючы іх будаваць радасны, гасцінны і братэрскі Касцёл-Сям'ю Божую ў Руандзе.
Святы Айцец удзяліў сваё апостальскае благаслаўленне біскупам, святарам, кансэкраваным асобам, свецкім вернікам і ўсім жыхарам Руанды.
