У 2025 годзе чатырнаццаць кардыналаў адзначаць 80-годдзе
Аляксандр Панчанка - Vatican News
22 студзеня 80-гадовы юбілей адзначыць аўстрыйскі кардынал Крыстаф Шонбарн, арцыбіскуп Венскі. 1 сакавіка – іспанскі кардынал Фернанда Вергез Альзага, старшыня Губернатарату Дзяржавы Ватыкан і Папскай камісіі па справах Дзяржавы Ватыкан. 6 красавіка – чылійскі кардынал іспанскага паходжання Сэлестына Аос Брака, арцыбіскуп-эмерыт Сант’яга-дэ-Чылі і былы старшыня чылійскага епіскапату.
19 красавіка 80 гадоў споўніцца індыйскаму сіра-малабарскаму кардыналу Георгу Аленчэры, Вярхоўнаму архіепіскапу-эмерыту Эрнакулам-Ангамалі. 16 мая – іспанскаму кардыналу Карласу Асору Сіеры, арцыбіскупу-эмерыту Мадрыда.
15 чэрвеня 80-гадовага ўзросту дасягне кардынал гвінейскага паходжання Рабэр Сара, прэфект-эмерыт Кангрэгацыі па справах Божага культу і Дысцыпліны сакрамэнтаў і былы старшыня Папскай рады Cor Unum. 4 ліпеня – кардынал польскага паходжання Станіслаў Рылка, архіпрэзбітэр Базілікі Санта-Марыя-Маджорэ, былы старшыня Папскай рады па справах свецкіх. 12 ліпеня – пакістанскі кардынал Джозэф Кутц, арцыбіскуп-эмерыт Карачы.
22 жніўня 80-гадовы юбілей адзначыць нядаўна прызначаны кардыналам англійскі дамініканін Цімаці Рэдкліф, былы генерал Ордэна Прапаведнікаў і духоўны асістэнт на XVI Звычайнай Генеральнай Асамблеі Сінода Біскупаў. 8 верасня – баснійскі кардынал Вінка Пуліч, арцыбіскуп-эмерыт Сараева. 15 кастрычніка – іспанскі кардынал Антоніа Канізарэс Лавэра, арцыбіскуп-эмерыт Валенсіі.
8 лістапада 80-годдзя дасягне англійскі кардынал Вінсэнт Нікалс, арцыбіскуп Вэстмінстэра і старшыня Канферэнцыі Біскупаў Англіі і Уэльса. 22 лістапада – кот-д’івуарскі кардынал Жан-П’ер Кутва, арцыбіскуп-эмерыт Абіджана, а 31 снежня – кардынал Філіп Накелентуба Уэдраога, арцыбіскуп-эмерыт Уагадугу ў Буркіна-Фасо.
З чатырнаццаці кардыналаў, якія ў 2025 годзе страцяць права голасу на будучым канклаве, 8 паходзяць з Еўропы, 3 – з Афрыкі, 2 – з Азіі і 1 – з Паўднёвай Амерыкі. З іх двое былі прызначаны Янам Паўлам ІІ, чатыры – Бэнэдыктам XVI і восем – Францішкам.
