CCEE: сусветная эканоміка патрэбуе евангельскага натхнення

Ян Глінскі

На сустрэчы сабраліся знаўцы сацыяльнай дактрыны Касцёла і прадстаўнікі еўрапейскіх епіскапатаў, якія разважалі як дух Евангелля можа натхніць на больш справядлівую сусветную эканоміку.

“Давайце зробім Зямлю лепшым месцам для ўсяго чалавецтва, асабліва для тых, хто не мае доступу да чыстай вады, дастатковай колькасці ежы, адукацыі і аховы здароўя”, – такі заклік быў змешчаны ў тэксце камюніке па выніках канферэнцыі.

Як прагучала на форуме, сацыяльнае вучэнне Касцёла ўказвае на законнасць прыватнай уласнасці, якая з’яўляецца гарантыяй свабоды і спрыяе вытворчасці дабротаў, але ў той жа час яно падкрэслівае прынцып “агульнай мэты дабротаў”, якія павінны служыць на карысць усіх. “Канчатковай мэтай эканомікі павінна быць не максімізацыя прыбытку, а агульнае дабро”, і таму рынкі, захоўваючы сваю справядлівую, але не абсалютную аўтаномію, “павінны кіравацца маральнымі прынцыпамі”. Як вучыць Папа Францішак, эканоміка, пабудаваная на выключэнні і няроўнасці, з’яўляецца “эканомікай, якая забівае”.

Прадстаўнікі сацыяльнай камісіі CCEE скіравалі заклік да ўсіх, хто прымае рашэнні, і да людзей добрай волі “ўкараняць евангельскія натхненні ў канкрэтную рэчаіснасць сусветнай эканомікі, палітыкі, законаў і штодзённага жыцця”.

“Мы заклікаем нашых хрысціянскіх братоў і сясцёр стаць соллю зямлі таксама ў сферы сацыяльнай справядлівасці, – напісалі аўтары камюніке. – Чалавецтва – гэта сям’я. Мы па сваёй сутнасці сацыяльныя істоты і можам быць шчаслівымі толькі разам”.

Падчас канферэнцыі згадвалася таксама пра неабходнасць душпастырскай падтрымкі ўдзельнікаў эканамічнага жыцця, якія часта сутыкаюцца з перашкодамі “на шляху інтэгральнага развіцця чалавека”. У гэтых пастырскіх намаганнях, як падкрэслівалася на форуме, неабходна перш за ўсё пачуць голас бедных і церпячых. “Чалавецтва павінна разбурыць тыя “структуры граху”, паводле слоў святога Яна Паўла ІІ, якія вядуць да няроўнасці і выключэння. Да такіх структур граху адносяцца, у прыватнасці, даўгавы ціск на бедныя краіны, падатковыя гавані або манаполія абмежаванай колькасці гульцоў у сферы высокіх тэхналогій і камунікацый”, – напісалі аўтары камюніке.