Выйшаў памятны медаль шостага года пантыфікату Францішка

Памятны медаль, прымеркаваны да шостага года пантыфікату папы Францішка, убачыць свет 26 ліпеня 2018 г. Яго можна будзе набыць непасрэдна ў Адміністрацыі маёмасці Апостальскай Сталіцы і ў афіцыйных ватыканскіх кнігарнях.

На аверсе медаля, які распрацавала італьянская мастачка К’яра Прынчыпэ, уверсе размешчана выява голуба, сімвала Духа Святога, які сваімі крыламі ахінае папскі герб, адчаканены ў цэнтры. Па баках бачны надпіс на лацінскай мове: “FRANCISCUS. P.M. ANNO VI”. Унізе ўказана імя аўтара.

Выява, размешчаная на рэверсным баку медаля, утрымлівае два супрацьлеглыя сюжэты. З аднаго боку – панаванне міру, увасобленага ў ласкавых абдымках маці і дзіця ў засені аліўкавых галінак, з іншага – юнак за калючым дротам, вобраз насілля і прымусу. Паміж дзвюма выявамі – квітнеючы мак, традыцыйны сімвал загінулых на вайне. Уздоўж знешняга краю размешчана фраза па-італьянску: “Nulla è perduto con la pace. Tutto può esserlo con la guerra” (Нічога не губляецца з мірам. Усё можна згубіць з вайной). Гэта цытата з Радыёпаслання папы Пія XII, прамоўленага ім 25 жніўня 1939 г., за некалькі дзён да пачатку Другой сусветнай вайны.

Памятны медаль выкананы ў трох варыянтах – з золата, срэбра і бронзы. Тыраж будзе абмежаваны: 30 залатых, 1,5 тыс. срэбных і 2 тыс. бронзавых асобнікаў, а таксама 30 набораў-трыпціхаў.

Кожны экземпляр медаля суправаджаецца гарантыйным сертыфікатам, пранумераваным і зацверджаным пячаткай Дзяржсакратарыята і Італьянскага манетнага двара, яго выканаўцы.

Памятныя медалі Пантыфік уручае прадстаўнікам урадавых і дыпламатычных дэлегацый краін падчас сустрэчы з імі ў Ватыкане ці ў рамках сваіх Апостальскіх падарожжаў.