Пантыфік пра “інтэлектуальную дабрачыннасць”

Францішак прыняў іх 1 кастрычніка 2018 г. у Ватыкане, а нагодай стала генеральная асамблея манаскага аб’яднання.

Пантыфік спаслаўся на тэму сустрэчы: “Будзьце дасканалымі – будзьце міласэрнымі”, і заўважыў, што святасць і практыкаванне цнотаў не зарэзерваваныя толькі для некаторых асоб або для пэўнага перыяду жыцця. “Усе могуць жыць у паўсядзённай вернасці хрысціянскаму пакліканню, а кансэкраваныя асобы, асаблівым чынам, у належным захаванні манаскіх абяцанняў”, - падкрэсліў Святы Айцец.

Папа заклікаў законнікаў ісці шляхам дабра і святасці, які вызначылі святыя, і які Касцёл указвае кожнаму верніку. Ён пажадаў ім “плённасці ўнутранай цішыні і гераізму цішыні знешняй”, а таксама практыкавання прынцыпу “святой безудзельнасці” св. Ігнацыя Лаёлы.

Францішак запрасіў членаў Інстытуту Любові падтрымліваць дабрачынныя ініцыятывы на матэрыяльным, інтэлектуальным, духоўным і душпастырскім узроўнях, слухаць Духа Святога, Які заўсёды “паказвае, дзе, калі і як любіць”.

Што тычыцца адукацыйных праектаў, Папа нагадаў законнікам, што навучанне – гэта не проста інструкцыі, але “інтэлектуальная дабрачыннасць”. Хрысціянская адукацыя, паводле Святога Айца, гэта навука, якая перадаецца ад Божага Слова, паўнатой якога з’яўляецца Езус Хрыстус.

Інстытут Любові заснаваў італьянец, кс. Антоніа Расміні ў 1828 г. Ён быў афіцыйна зацверджаны Святым Пасадам у 1838 г.