Францішак: падзякуем Пану за дар хросту

Дзякаваць Пану да дар веры і заставацца мужнымі сведкамі Езуса, заклікаў Францішак на заканчэнне агульнай аўдыенцыі, якая 9 студзеня 2019 г. прайшла ў ватыканскай Зале Паўла VI.

“У бліжэйшую нядзелю мы будзем адзначаць свята Хросту Пана. Гэта свята, якое завяршае літургічны перыяд Божага Нараджэння, запрашае нас адкрыць нанова ласку сакрамэнту нашага хросту. Праз яго мы сталі хрысціянамі, злучыўшыся з Хрыстом і Яго Касцёлам”, - сказаў Папа.

Каб годна падрыхтавацца да свята, Францішак заклікаў вернікаў даведацца пра дату свайго хросту і заўсёды памятаць пра яе, як пра дзень свайго нараджэння для веры. “Падзякуем Пану за дар веры і папросім Святога Духа аб сіле, кабмы былі мужнымі сведкамі Езуса”, - заахвоціў Пантыфік.

Свята Хросту Пана Касцёл адзначае ў нядзелю пасля ўрачыстасці Аб’яўлення Пана. Сёлета, гэта 13 студзеня 2019 г. Па традыцыі, у гэты дзень Пантыфік удзяляе сакрамэнт хросту дзецям. Абрад адбываецца падчас св. Імшы ў Сікстынскай капэле.

Навіна ў фармаце аўдыё