Дыялог з ісламам у цэнтры паездкі Пантыфіка ў Эміраты

Арцыбіскуп Фелікс Энтані Мачадо перакананы, што ў цэнтры папскага візіту ў Аб’яднаныя Арабскія Эміраты знаходзіцца дыялог з ісламам. Францішак хоча “заклікаць католікаў па ўсім свеце, каб рэалізавалі на практыцы вучэнне Касцёла адносна дыялогу з мусульманамі”.

Біскуп дыяцэзіі Васаі ў Індыі спаслаўся, між іншым, на запланаваную сустрэчу Папы з Сусветнай Мусульманскай Радай Старэйшын. “Гэта група, якая падрыхтавала папскі візіт. Яны хацелі б, каб лідары ўсіх рэлігій разам думалі, як забяспечыць мір паміж імі ў глабальным маштабе”, - патлумачыў іерарх.

“Ініцыятыва зыходзіла ад сунітаў, лідарам якіх з’яўляецца Вярхоўны імам мячэці Аль-Азхар у Каіры. Ён шукае падтрымкі з боку Францішка, які прымае вельмі актыўны ўдзел у пабудове міру”, - падкрэсліў арцыбіскуп Мачадо.

Іерарх пракаментаваў і крытычныя ў адносінах да візіту Святога Айца галасы, якія лічаць, што ён непатрэбны ў краіне, дзе няма мясцовага каталіцкага насельніцтва. “Касцёл не можа засяроджвацца на сабе, трэба глядзець вонкі. Хоць празелітызм у Эміратах забаронены, хрысціяне тут складаюць каля 14% насельніцтва і маюць у сваім распараджэнні па меншай меры 31 храм. Як і прадстаўнікі іншых рэлігій, яны не могуць вызнаваць сваёй веры публічна. Але ўлады іх не пераследуюць, калі набажэнствы адбываюцца ў прыватных будынках. Касцёл не можа чакаць, пакуль правы чалавека стануць агульнапрынятымі. Павінен дзейнічаць у сітуацыі, у якой знаходзіцца, паколькі асабліва ў краінах Персідскага заліва ён не можа чакаць аптымальных умоў”, - патлумачыў былы супрацоўнік Папскай рады па міжрэлігійным дыялогу.