Пантыфік прызначыў Камерленга Святога Рымскага Касцёла
71-гадовы амерыканскі іерарх ірландскага паходжання Кевін Джозэф Фарэл, былы арцыбіскуп Даласа, з 15 жніўня 2016 г. узначальвае Дыкастэрыю па справах свецкіх сям’і і жыцця. Кардынальскую годнасць атрымаў 19 лістапада 2016 г. Ён змяніў на пасадзе Камерленга кардынала Жана-Луі Тарана, памерлага 5 ліпеня 2018 г.
Пасада Камерленга Святога Рымскага Касцёла з’яўляецца адной з двух самых высокіх у Касцёле (разам з Дзяржсакратаром), якія захоўваюцца са смерцю або адстаўкай Папы. Падчас “sede vacante” менавіта ён кіруе фінансамі і ўласнасцю Касцёла.
Больш канкрэтна задачы і функцыі Камерленга вызначаюць дзве Апостальскіх канстытуцыі св. Яна Паўла II: “Pastor Bonus” з 1988 г. і „Universi dominici gregis” з 1996 г. У пункце 17 першага дакумента гаворыцца, што Камерленга Святога Рымскага Касцёла павінен афіцыйна сцвердзіць смерць Папы і апячатаць яго кабінет і кватэру, а затым зрабіць тое ж з усімі папскімі апартаментамі. Менавіта ён адказвае за апавяшчэнне пра смерць Святога Айца кардынала-вікарыя Рыма, які, у сваю чаргу, афіцыйна перадае гэту навіну жыхарам горада. Таксама ў яго часовае валоданне пераходзіць Апостальскі палац у Ватыкане, а таксама палацы на Латэране і ў Кастэль Гандольфа.
З часоў Паўла VI чарговымі Камерленга былі кардыналы: Бэнэдэта Алаізі Мазэла (1958-1970 гг.), Жан Віё (1970-1979 гг.), Паола Бэртолі (1979-1985 гг.), Себасц’яна Баджо (1985-1993 гг.), Эдуарда Марцінес Сомало (1993- 2007 гг.), Тарчызіа Бэртонэ (2007-2014 гг.) і Жан-Луі Таран (2014-2018 гг.).
