Папа на Імшы ў Бангкоку: моладзь і ўкаранёнасць у веры бацькоў

У літургіі прынялі ўдзел тысячы маладых вернікаў з усяго Тайланду. На пачатку гаміліі Пантыфік заўважыў, што, калі маладыя людзі сустракаюць у жыцці цяжкасці, праблемы і перашкоды, іх сэрцы могуць астыць, іх можа апанаваць смутак. Ён спытаў удзельнікаў Эўхарыстыі, ці не адбылося гэта з імі?

Францішак нагадаў тайландскай моладзі, што пошуку Пана ў кожнай сітуацыі можа дапамагчы велічная гісторыя евангелізацыі іх краіны. “Гэта цудоўная катэдра з’яўляецца сведкай веры ў Хрыста, якую мелі вашы продкі: глыбока ўкаранёная вернасць натхніла іх да добрых спраў, будавання іншай святыні, яшчэ больш прыгожай, складзенай з жывых камянёў, каб мелі магчымасць несці міласэрную любоў Бога людзям свайго часу”, - сказаў ён.

Папа нагадаў маладым людзям, што для падтрымання полымя духа ў сэрцы, трэба быць глыбока ўкаранёным у веры бацькоў. “Не для таго, каб заставацца нявольнікамі мінулага, але, каб навучыцца адвазе, якая дапаможа адказаць на новую гістарычную сітуацыю”, - заўважыў ён.

Паводле Святога Айца, укаранёнасць у веры дапамагае не губляць увагі перад абліччам шматлікіх галасоў гэтага свету, якія намагаюцца звесці з Божага шляху. “Укаранёныя ў Хрысце, глядзіце з радасцю і даверам. Гэты стан звязаны з усведамленнем таго, што Пан бясконца шукае, сустракае і любіць нас”, - звярнуў увагу Францішак.

Сяброўства з Хрыстом – гэта алей, неабходны для асвятлення шляху, свайго і людзей, якія нас акружаюць, у тым ліку і тых, хто думае інакш, чым мы, - падзяліўся з маладымі тайландцамі Папа.