Папа прызначыў новага прэфекта Кангрэгацыі Евангелізацыі Народаў

Філіпінскі іерарх змяніў на пасадзе прэфекта кардынала Фэрнанда Філоні, які быў прызначаны Вялікім магістрам Рыцарскага Ордэна Святога Гроба Пана ў Іерусаліме. Ён змяніў на гэтай пасадзе амерыканскага кардынала Фрэдэрыка Эдвіна О’Браена, якому 8 красавіка 2019 г. споўнілася 80 гадоў.

Кардынал Тагле стаў другім у гісторыі прадстаўніком азіяцкага кантынента на чале Кангрэгацыі Евангелізацыі Народаў. З 2006 па 2011 г. яе ўзначальваў кардынал Іван Дыяс з Індыі.

Луіс Антоніа Тагле нарадзіўся 21 чэрвеня 1957 г. у Маніле. Прэзбітэрскае пасвячэнне атрымаў у 1982 г. З 1985 па 1991 г. вывучаў тэалогію ў Амерыканскім каталіцкім універсітэце ў Вашынгтоне. Абараніў доктарскую дысертацыю. Займаўся душпастырскай і выкладчыцкай дзейнасцю. З 1997 па 2003 г. быў членам Міжнароднай тэалагічнай камісіі, у якасці эксперта прымаў удзел у Сінодзе Біскупаў, прысвечаным Азіі. У 2001 г. Ян Павел ІІ прызначыў яго біскупам дыяцэзіі Імус на Філіпінах. У 2009 г. па ініцыятыве маладога іерарха адбыліся першыя Азіяцкія дні моладзі. З 2011 г. – арцыбіскуп Манілы. У 2012 г. атрымаў кардынальскую годнасцю. У 2015 г. быў абраны кіраўніком “Caritas Internationalis”.