Святы Пасад пра драму самотных пажылых людзей падчас пандэміі

Дакумент быў абнародаваны 7 красавіка 2020 г. У ім цытуюцца словы Папы: “пасярод гэтай нечаканай і бязлітаснай буры мы ўбачылі, што знаходзімся ў адной лодцы”. “У ёй знаходзяцца таксама пажылыя. (...) Іх пакаленне плаціць самую дарагую цану падчас пандэміі COVID 19. Статыстыка кажа, што ў Італіі больш за 80% памерлых былі старэйшымі за 70 гадоў”, - адзначаецца ў пасланні.

Аўтары нагадваюць, што “самотнасць можа быць хваробай, але з дапамогай любові, блізкасці і духоўнага суцяшэння, мы можам яе перамагчы”. Таму важна зрабіць усё магчымае, каб адказаць на гэту праблему, бо “у сённяшнім кантэксце, гэта можа азначаць выратаванне чалавечых жыццяў”.

Касцёл ужо знайшоў новыя формы падтрымкі пажылых самотных людзей: праз тэлефанаванні, відэа- і аўдыёпасланні, лісты, дастаўку прадуктаў і лекаў, удзяленне сакрамэнтаў дома. Але сур’ёзнасць сітуацыі заклікае нас рабіць яшчэ больш: маліцца за пажылых, лячыць хваробу самотнасці, ствараць сеткі салідарнасці і многае іншае.

Калі цэлае пакаленне апынулася пад ударам, мы нясём агульную адказнасць, якая нараджаецца з усведамлення неад’емнай каштоўнасці чалавечага жыцця і ўдзячнасці да нашых бацькоў, дзядуль і бабуль. “Не пакінем жа пажылых людзей самотнымі, бо з самотнасцю каронавірус заб’е яшчэ больш”, - падкрэсліваецца ў звароце.

Асаблівая ўвага звяртаецца на сітуацыю ў дамах і пансіянатах для пажылых людзей. “У краінах, дзе пандэмія пакуль мае абмежаваную форму, яшчэ магчыма прыняць прафілактычныя меры, каб абараніць іх. А там, дзе сітуацыя больш драматычная, трэба знаходзіць надзвычайныя рашэнні. Гаворка ідзе пра будучыню нашых касцёльнай і грамадскай супольнасцей, бо як казаў нядаўна папа Францішак: “пажылыя людзі – гэта сённяшні і заўтрашні дзень Касцёла”, - нагадала Дыкастэрыя па справах свецкіх, сям’і і жыцця.

“З’яднаемся ў малітве за бабуль і дзядуль ва ўсім свеце. Злучымся вакол іх думкамі і сэрцамі, і там, дзе магчыма, будзем дзейнічаць, каб не былі самотнымі”, - гучыць заклік Святога Пасаду.