Пантыфік прывітаў веласіпедыстаў Tour de Pologne

“Шчыра вітаю ўдзельнікаў Міжнароднага велапрабегу Tour de Pologne, які сёлета праводзіцца ў гонар св. Яна Паўла II у стагоддзе яго нараджэння”, - сказаў Папа 9 жніўня 2020 г. пасля малітвы “Анёл Панскі”.

Тур Польшчы карыстаўся папулярнасцю яшчэ ў міжваенны перыяд, а сёння лічыцца адным з найважнейшых спаборніцтваў раварыстаў у свеце. Спецыяльна для турніру 2020 г. быў распрацаваны маршрут, які злучыў гарады, што адыгралі асаблівую ролю ў жыцці Караля Вайтылы - Яна Паўла ІІ.

Гісторыя польскай велагонкі пачалася ў 1928 г. Арганізатарамі першага турніру выступілі газета Спартыўны агляд (Przegląd Sportowy) і Варшаўскае таварыства веласіпедыстаў, адна з найстарэйшых спартыўных арганізацый у Польшчы: яе членамі былі Нобелеўскі лаўрэат па літаратуры Генрык Сянкевіч і выбітны польскі пісьменнік Баляслаў Прус.