Папа заклікаў супрацоўнікаў Ватыкана да радаснага сведчання
21 снежня 2020 г. Пантыфік прыняў на аўдыенцыі супрацоўнікаў структур Святога Пасаду і Дзяржавы Ватыкан, разам з членамі іх сем’яў. Сустрэча адбылася ў Зале Паўла VI і была прымеркавана да Божага Нараджэння.
У прамове Папа заклікаў сваіх гасцей ісці да Хрыста, наследуючы прыклад пастухоў з Евангелля. “Мы павінны скінуць з сябе смутак, нуду, апатыю, абыякавасць і страх, асабліва ў гэты час надзвычайнай эпідэміялагічнай сітуацыі, калі цяжка знайсці энтузіязм для жыцця і веры. Па прыкладзе пастухоў мы пакліканы прыняць тры паставы: убачыць, сузіраць і абвяшчаць”, - сказаў Францішак.
На думку Святога Айца, важна ўбачыць нараджэнне Божага Сына як самую значную падзею гісторыі. “Прамінула дваццаць стагоддзяў, а Езус жывы як ніколі. А тыя, хто аддаліліся ад Яго ў сваіх паводзінах, даюць яшчэ адно сведчанне пра Езуса: без Яго чалавек трапляе ў зло, грэх, заганы, эгаізм, насілле, нянавісць. Слова сталася целам і пасялілася між намі: вось падзея, якую мы павінны нанова адкрыць для сябе”, - падкрэсліў Папа.
Гаворачы пра важнасць сузірання, Францішак заўважыў, што дзякуючы яму можна зразумець дабрыню, ласкавасць і любоў Бога. “Бог паказвае сваю дабрыню, каб збавіць нас. А што значыць быць збаўленым? – Гэта значыць увайсці ў жыццё Бога, стаць прыёмнымі дзецьмі Бога праз хрост. Вось вялікае значэнне Божага Нараджэння: Бог становіцца чалавекам, каб мы маглі стаць дзецьмі Бога”, - сказаў Святы Айцец.
Пантыфік заклікаў супрацоўнікаў ватыканскіх структур праслаўляць Бога, абвяшчаючы Яго не толькі словамі, але і жыццём сведчаннем, у першую чаргу праз радасць і супакой, якія паходзяць ад веры і любові: радасць і супакой нягледзячы ні на што, і перш за ўсё.
