Папа прывязе з сабой у Ірак каштоўны манускрыпт

Гаворка ідзе пра Сідру – літургічную кнігу сіра-хрысціянскай традыцыі, напісаную на арамейскай мове ў XIV-XV стст. У ёй змешчаны малітвы, прызначаныя на Вялікдзень і свята Святога Крыжа.

Да нядаўняга часу манускрыпт захоўваўся ў касцёле Беззаганнай Панны Марыі ў іракскім горадзе Каракош, у Нінэвійскай даліне, аднак з наступленнем тэрарыстаў у 2014-2017 гг. ён быў тэрмінова “эвакуіраваны” ў Італію, дзе прайшоў рэстаўрацыю.

Францішак асабіста даставіць Сідру ў Каракош падчас свайго Апостальскага падарожжа ў Ірак. Яно будзе праходзіць 5-8 сакавіка 2021 г. Манускрыпт яму перадалі прадстаўнікі Федэрацыі хрысціянскіх арганізацый Міжнароднага валанцёрскага служэння (Federazione degli Organismi cristiani Servizio Internazionale Volontario), якія ў супрацоўніцтве з італьянскім Міністэрствам аховы культурнай спадчыны прымалі ўдзел у ратаванні старажытнай кнігі.

Манускрыпт быў у кепскім стане. Для аднаўлення тэксту, змешчанага на яго старонках, спатрэбілася правядзенне лінгвістычнага аналізу з выкарыстаннем падобных сірыйскіх кніг, якія захоўваюцца ў Ватыканскай апостальскай бібліятэцы. Працэс рэстаўрацыі працягваўся каля 10 месяцаў. Адзіным элементам кнігі, які спатрэбілася замяніць, стала нітка, якая злучала паміж сабой яе старонкі.

Вяртанне манускрыпта ў Ірак стане часткай працы, накіраванай па аднаўленне грамадскага і культурнага жыцця ў краіне, спакутаванай ад войнаў, нестабільнасці і тэрарызму.