Пантыфік: Касцёл пакліканы вызваліць свет ад няволі граху і згубы надзеі
Аляксандр Панчанка – Vatican News
У цэнтры гісторыі святых Пятра і Паўла “не былі іх цудоўныя здольнасці, але сустрэча з Хрыстом, якая змяніла іх жыццё”. Яны спазналі любоў, якая іх аздаравіла і вызваліла, і таму сталі апосталамі і распарадчыкамі вызваленнямі для іншых, - заўважыў Пантыфік на пачатку сваёй гаміліі.
“Пётр і Павел з’яўляюцца свабоднымі выключна таму, што былі вызвалены”. Разважаючы над гэтым сцвярджэннем Папа заўважыў, што Пётр быў “у першую чаргу вызвалены ад пачуцця неадпаведнасці і горычы паразы”, а адбылося гэта дзякуючы безумоўнай любові Езуса.
Хрыстус вызваліў Пятра ад страху, разліку, заснаванага на чалавечых гарантыях, ад клопатаў гэтага свету, напоўніўшы яго адвагай рызыкаваць усім і радасцю адчування сябе лаўцом людзей, а таксама даў яму ключы ад брамы, “якая вядзе да сустрэчы з Панам, і ўладу звязваць і развязваць: звязваць братоў з Хрыстом і развязваць вузлы і путы іх жыцця”. У жыцці Пятра пачалася новая гісторыя: адкрытасці, вызвалення, разарваных путаў, выйсця з няволі, якая робіць закрытым. “Пётр перажыў досвед Пасхі: Пан вызваліў яго”, - дадаў Папа.
Пасху ў сваім жыцці перажыў таксама і апостал Павел. Езус вызваліў яго ад самай прыгнятальнай няволі – ад зняволення ўласным эга, а таксама ад рэлігійнага запалу, які зрабіў яго жорсткім у падтрымцы атрыманых традыцый і гвалтоўным у пераследзе хрысціян. “Фармальнае захаванне рэлігіі і абарона традыцый з выцягнутым мячом, замест таго, каб адкрыць яго на любоў да Бога і братоў, зрабілі яго закамянелым. Бог вызваліў яго ад гэтага, але “не вызваліў ад шматлікіх слабасцей і цяжкасцей, якія зрабілі больш плённай яго евангелізацыйную місію”, - сказаў Пантыфік.
“Дарагія браты і сёстры, Касцёл глядзіць на гэтых двух гігантаў веры і бачыць двух апосталаў, якія вызвалілі ў свеце моц Евангелля толькі таму, што спачатку былі вызвалены праз сустрэчу з Хрыстом. Ён не асуджаў іх, не прыніжаў, але раздзяліў іх жыццё з любоўю і блізкасцю, падтрымліваючы іх сваёй малітвай, а часам заклікаючы да навяртання, каб падштурхнуць да перамены... Так Езус робіць і з намі: запэўнівае ў сваёй блізкасці, молячыся за нас, заступаючыся перад Айцом; і з ласкавасцю папракае, калі памыляемся, каб маглі знайсці сілу для таго, каб падняцца і працягваць шлях”, - сказаў Папа.
Францішак заўважыў, што толькі свабодны Касцёл з’яўляецца пераканаўчым. “Як Пётр мы пакліканы быць свабоднымі ад пачуцця паразы перад абліччам рыбнай лоўлі, якая часам бывае няўдачнай; быць свабоднымі ад страху, які паралізуе і робіць баязлівымі, замыкаючы на нашых гарантыях і пазбаўляючы адвагі прароцтва. Як Павел мы пакліканы быць свабоднымі ад крывадушнай засяроджанасці на вонкавым; быць свабоднымі ад спакусы сілай навязваць сябе свету, а не слабасцю, якая стварае месца для Бога; свабоднымі ад такой рэлігійнасці, якая робіць нас закамянелымі і нягнуткімі; свабоднымі ад неадназначных сувязяў з уладай і страху быцця аб'ектам непрыняцця і нападаў”, - дадаў Пантыфік.
“Пётр і Павел даюць нам вобраз Касцёла, даверанага нашым рукам, але які Пан вядзе з вернасцю і ласкавасцю; Касцёла слабога, але моцнага прысутнасцю Бога; Касцёла свабоднага, які можа прынесці свету тое вызваленне, якога свет няздольны даць сабе сам: вызваленне ад граху, смерці, роспачы, пачуцця несправядлівасці, ад згубы надзеі, што абцяжарвае жыццё жанчын і мужчын нашага часу”, - сцвердзіў ён.
“Спытаем у сябе: наколькі нашы гарады, нашы грамадствы, наш свет патрабуюць вызвалення? Колькі путаў павінна быць разарвана і колькі замкнёных дзвярэй павінна быць расчынена! Мы можам стаць супрацоўнікамі гэтага вызвалення, але толькі калі першымі дазволім навіне Езуса вызваліць нас і калі будзем крочыць у свабодзе Святога Духа”, - сказаў Папа.
Пантыфік прывітаў арцыбіскупаў-мітрапалітаў, прызначаных на працягу апошняга году, якім пазней уручыў паліі, а таксама скіраваў словы прывітання да дэлегацыі Канстантынопальскага Патрыярхату, прысутнасць якой назваў “знакам адзінства на шляху вызвалення ад адлегласцей, якія абуральна раздзяляюць людзей, якія вераць у Хрыста”.
“Молімся за вас, за пастыраў, за Касцёл, за ўсіх нас, каб, вызваленыя Хрыстом, мы маглі быць апосталамі вызвалення для ўсяго свету”, - завяршыў гамілію Святы Айцец.
