Папа гатовы наведаць Маскву і сустрэцца з Патрыярхам Кірылам
Аляксандр Панчанка – Vatican News
“Сустрэча з Патрыярхам Кірылам – у недалёкай перспектыве. Мне здаецца, што на наступным тыдні да мяне прыбудзе [Мітрапаліт] Іларыён, каб узгадніць магчымую сустрэчу. Патрыярх павінен здзейсніць падарожжа, здаецца ў Фінляндыю. Я заўсёды гатовы паехаць у Маскву. Каб паразмаўляць з братам не патрэбны пратаколы”, - сказаў Папа, адказваючы на пытанне журналісткі агенцтва ТАСС пра магчымасць яго новай сустрэчы з Патрыярхам Маскоўскім.
Францішак заўважыў, што падчас візіту на Кіпр і ў Грэцыю сустракаўся з прадстаяцелямі мясцовых Праваслаўных Цэркваў. “Мы ўсе браты і мы кажам усё ў твар, кажам у вочы, але як браты. Гэта цудоўна, калі браты кажуць, што прыналежаць да той жа Маці, да Маці-Касцёла, але сталі крыху падзеленымі. Мы павінны ісці разам і спрабаваць працаваць у адзінстве і дзеля аднінства”, - дадаў Пантыфік.
Святы Айцец выказаў перакананасць адносна таго, што трэба працягваць прамыя кантакты і дыялог і “не чакаць тэолагаў”. “Тэолагі павінны працягваць даследаванні, бо гэта дапамагае прыйсці да адзінства, але тым часам мы павінны ісці наперад, молячыся разам, займаючыся справамі міласэрнасці. Працаваць і маліцца разам – гэта мы можам рабіць. Адзінства пачынаецца сёння з гэтага”, - заключыў Папа.
Каментуючы іншыя тэмы, Францішак назваў анахранізмам нядаўнюю спробу прыняцця Еўракамісіяй унутранай дырэктывы, якая рэкамендавала не ўжываць назву “Божае нараджэнне”. Папа заўважыў, што на працягу гісторыі рабіць падобныя рэчы імкнуліся многія дыктатуры.
На думку Святога Айца, важна вярнуцца да ідэалаў айцоў-заснавальнікаў, а не займацца “ідэалагічнай каланізацыяй”, якая можа прывесці да падзелу і краху Еўрапейскага Саюза. Пантыфік адзначыў таксама неабходнасць павагі да адметнасцей і асаблівасцей розных краін ЕС.
Гаворачы аб крызісе дэмакратыі, на які ён звяртаў увагу падчас сустрэчы з грэчаскім істэблішментам у Афінах, Францішак падкрэсліў, што “дэмакратыя – гэта скарб цывілізацыі”, які павінен быць захаваны. Першай пагрозай для яе, паводле Папы, з’яўляецца папулізм. Ён прывёў прыклад нацысцкай Германіі, дзе папулізм выкарыстоўваўся для абароны нацыянальных каштоўнасцей, а прывёў да задушэння дэмакратыі і ўзнікнення бязлітаснай дыктатуры, ахвярамі якой стала мноства людзей.
Іншай пагрозай для дэмакратыі Пантыфік назваў адмаўленне краін ад сваіх каштоўнасцей, ад уласнай тоеснасці на карысць пэўнага роду “імперыі”, наднацыянальнага ўраду, міжнародных эканамічных і культурных сіл.
Каментуючы міграцыйную праблему і “моду на ўзвядзенне муроў ці агароджаў з калючага дроту”, Францішак заўважыў, што тыя, хто робіць гэта, павінны памятаць пра ўласны гістарычны досвед, калі самі былі мігрантамі і павінны былі ўцякаць. Ён таксама адзначыў важнасць дыялогу, адносна таго, колькі мігрантаў зможа прыняць і інтэграваць тая ці іншая краіна.
Пантыфік падкрэсліў, што аўтарамі тэрактаў у Бельгіі ў 2016 г. былі неінтэграваныя мігранты, які жылі ў сапраўдным “гета”. “Прыняць мігрантаў, вырашыць праблему мігрантаў – нялёгка. Але, калі мы не вырашым яе, рызыкуем спрычыніцца за крушэння цывілізацыі”, - дадаў Святы Айцец.
