Пантыфік: свет патрабуе сведчання адзінства Усходніх Касцёлаў
Аляксандр Панчанка – Vatican News
18 лютага 2022 года Францішак сустрэўся з Патрыярхамі і Вярхоўнымі архіепіскапамі Усходніх Касцёлаў, а затым звярнуўся да ўдзельнікаў пленарнай сесіі Кангрэгацыі Усходніх Касцёлаў і сімпозіума, прысвечанага 25-годдзю Інструкцыі па выкарыстанні літургічных прадпісанняў Кодэкса канонаў Усходніх Касцёлаў.
Святы Айцец пачаў свой зварот, нагадваючы словы Бэнэдыкта XV, заснавальніка ўзгаданай Кангрэгацыі і Папскага Усходняга Інстытута, 100-годдзе з дня смерці якога адзначаецца сёлета. У энцыкліцы Dei Providentis гэты Папа пісаў: “У Касцёле Езуса Хрыста, які не з’яўляецца ні лацінскім, ні грэчаскім, ні славянскім, але каталіцкім, не існуе якой-кольвечы дыскрымінацыі паміж яго дзецьмі, і таму ўсе – лаціняне, грэкі, славяне і дзеці іншых народнасцей, аднолькава важныя”.
Францішак нагадаў таксама, што Бэнэдыкт XV асуджаў нецывілізаванасць вайны, называючы яе “бессэнсоўнай бойняй”: аднак, яго папярэджанні не былі пачуты кіраўнікамі краін, што прымалі ўдзел у Першай сусветнай вайне, як і заклік святога Яна Паўла ІІ, што намагаўся спыніць канфлікт у Іраку.
Пантыфік заўважыў, што ў наш час, пазначаны шматлікімі войнамі, такі самы лёс падзяляюць заклікі да міру, якія скіроўваюць Папы і шматлікія людзі добрай волі. “Чалавецтва, якое хваліцца дасягненнямі ў навуцы, мысленні, многіх добрых справах... крочыць назад у будаванні міру” і становіцца “чэмпіёнам па войнах”, - сказаў Святы Айцец, падкрэсліваючы, што “мы павінны маліцца і прасіць аб прабачэнні за такія паводзіны”.
“Мы спадзяваліся, што не будзе патрэбы паўтараць падобныя словы ў трэцім тысячагоддзі; аднак, чалавецтва, здаецца ўсё яшчэ блукае ў цемры”, - з жалем дадаў Пантыфік, нагадваючы пра канфлікты на Блізкім Усходзе, у Сірыі і Іраку; у эфіопскі рэгіёне Тыграй; пра “пагрозлівыя ветры, якія дзьмуць са стэпаў Усходняй Еўропы, падпальваючы кноты і агні ўзбраенняў, і пакідаючы холад у сэрцах бедных і нявінных”. Папа звярнуў увагу таксама пра драму Лівана, якому пагражае голад.
Святы Айцец звярнуў увагу на распаўсюджаную міграцыю з рэгіёнаў, якія з’яўляюцца роднымі для Каталіцкіх Усходніх Касцёлаў і на шматлікія дыяспары ўсходніх католікаў у розных частках свету. Папа заклікаў клапаціцца пра захаванне евангелізацыйнай тоеснасці, яшчэ больш прыслухоўвацца да багацця розных традыцый, дазволіць літургіі фармаваць паводле Божага слова і Духа, а таксама, захоўваючы уласную выключнасць, сведчыць аб адзінстве перад іншымі хрысціянамі і светам.
"Давайце будзем сцерагчыся эксперыментаў, якія могуць нашкодзіць шляху да бачнага адзінства ўсіх вучняў Хрыста. Свет патрабуе сведчання адзінства: калі мы будзем выклікаць скандал шляхам літургічных спрэчак, – на жаль, гэта мела месца і зусім нядаўна, – мы дапаможам таму, хто з'яўляецца настаўнікам падзелаў", - падкрэсліў на заканчэнне прамовы Францішак.
