Папа прыме ўдзел у тэлемосце з амерыканскімі студэнтамі
Аляксандр Панчанка – Vatican News
Францішак звернецца да ўдзельнікаў тэлемоста пасля ўступнага слова амерыканскага кардынала Блэза Супіча, арцыбіскупа Чыкага, і прафесара Эмільсэ Куды, выкладчыцы Папскага аргентынскага каталіцкага ўніверсітэта і сакратара Папскай камісіі па справах Лацінскай Амерыцы.
Затым прадстаўнікі кожнай з рэгіянальных груп раскажуць Святому Айцу пра сваю працу і праекты, а таксама зададуць пытанні пра сучаснасць і будучыню іх краін, пакалення і жыцця. Дыялог адбудзецца згодна з сінадальнай метадалогіяй: “сустракацца, слухаць, распазнаваць”. За ім можна будзе сачыць дзякуючы прамой трансляцыі на англійскай, іспанскай і партугальскай мовах на сайце www.luc.edu.
Ініцыятыва мае на мэце аблегчыць сапраўдны і канструктыўны дыялог паміж студэнтамі ўніверсітэтаў з Паўночнай, Цэнтральнай і Паўднёвай Амерыкі, падтрымаць іх здольнасці будаваць масты і трывалыя адносіны, якія вядуць да ўзаемнага разумення, суперажывання і супольнай мудрасці. Яна таксама павінна паслужыць выкарыстанню гэтых мастоў і адносін для распазнання і супольнай працы, цяпер і ў будучыні, над канкрэтнымі рашэннямі і праектамі на карысць раўнавагі навакольнага асяроддзя, эканамічнай справядлівасці і інтэгральнага развіцця чалавека.
Арганізатарамі анлайн-сустрэчы з’яўляюцца Дэпартамент тэалогіі езуіцкага Універсітэта імя Ігнацыя Лаёлы ў Чыкага і Папская камісія па справах Лацінскай Амерыкі.
