Папа спачувае ахвярам стыхійных бедстваў і дзякуе медработнікам

Францішак выказаў спачуванне ахвярам стыхійных бедстваў на Мадагаскары і ў Бразіліі, а таксама павіншаваў медыцынскіх работнікаў, якія ў Італіі святкуюць свой прафесійны дзень.

Аляксандр Амяльчэня - Vatican News

“Дарагія браты і сёстры, хачу выказаць спачуванне тым групам насельніцтва, якія пацярпелі ад стыхійных бедстваў у апошнія дні. Я маю на ўвазе, у прыватнасці, паўднёва-ўсходні Мадагаскар, які пакутуе ў выніку шэрагу цыклонаў, і раён Петропаліс у Бразіліі, спустошаны паводкамі і селямі. Няхай Пан прыме памерлых у спакоі, суцешыць іх сем’і і падтрымае тых, хто нясе дапамогу”, - звярнуўся Папа 20 лютага 2022 года пасля малітвы Анёл Панскі.

Францішак спаслаўся на Нацыянальны дзень медыцынскіх работнікаў, які адзначаюць у Італіі. “Не варта забывацца пра вялікую колькасць урачоў, медсясцёр, медбратоў і валанцёраў, якія знаходзяцца побач з хворымі, даглядаюць іх, дапамагаюць ім адчуваць сябе лепш. (...) Калі мы хварэем, нам патрэбны той, хто нас выратуе, хто дапаможа”, - адзначыў ён. Папа падзякаваў медыцынскім работнікам за гераізм падчас пандэміі каронавіруса.

Завяршаючы нядзельную сустрэчу, Пантыфік пажадаў вернікам добрай нядзелі і папрасіў маліцца за яго.