Францішак заклікаў да перамір'я і малітвы за мір ва Украіне

Аляксандр Амяльчэня - Vatican News

Францішак нагадаў пра Вялікдзень, які адзначаецца паводле юліянскага календара, і перадаў усім Цэрквам Усходу, каталіцкім і праваслаўным, свае найлепшыя пажаданні.

Пантыфік нагадаў пра вайну ва Украіне, якая доўжыцца ўжо два месяцы, і падкрэсліў, што яна стала яшчэ больш агрэсіўнай і жорсткай.

“Я паўтараю свой заклік да велікоднага перамір'я, мінімальнага і адчувальнага знака імкнення да міру. Трэба спыніць наступ і пакласці канец пакутам знясіленага насельніцтва. Трэба спыніцца, падпарадкоўваючыся словам Уваскрослага, які ў дзень Пасхі паўтарае сваім вучням: “Спакой вам!”. Прашу ўсіх узмацніць малітву за мір і мець адвагу сказаць і паказаць, што мір магчымы. Палітычныя лідары, прыслухайцеся да голасу людзей, якія хочуць міру, а не эскалацыі канфлікту”, - звярнуўся Францішак у Нядзелю Божай Міласэрнасці.