Пантыфік: гісторыі пра спагаду змяняюць жыццё людзей і грамадстваў
Аляксандр Панчанка – Vatican News
Францішак напісаў прадмову да кнігі Тканне свету (Tessitura del mondo), у якой сабраны артыкулы 44-х пісьменнікаў, мастакоў, дзеячаў культуры, тэолагаў і журналістаў на тэму расповеду, якія публікаваліся на старонках ватыканскай газеты L’Osservatore Romano у перыяд з лютага па кастрычнік 2020 года. Натхненнем для іх паслужыла пасланне Святога Айца, прымеркаванае да 55-га Сусветнага дня масавай камунікацыі на тэму: “І каб ты распавядаў...” (Зых 10, 2). Жыццё становіцца гісторыяй”.
Пантыфік заўважыў, што распавядаць гісторыі значыць нібыта ткаць палатно, “незнішчальныя ніткі” якога будуць злучаць мінулае з сучаснасцю, а таксама ўсіх людзей паміж сабой.
Іншы апсект расповеду – гэта таямніца, якая адкрывае на трансцэндэнтнасць, на духоўнае, рэлігійнае вымярэнне, бо гісторыі дапамаюць “адчуць боскае дыханне”, а дзякуючы ім “думкі іншых людзей набываюць дзіўнае жыццё ў нас”. Таму “літаратура з’яўляецца адным з найбольш духоўных відаў мастацтва з усіх і безумоўна найбольш спрыяе ператварэнню”, - заўважыў Папа.
“Як ніякі іншы від камунікацыі, гісторыя можа змяніць наш лад мыслення, у кірунку дабра ці зла... Старажытныя і сучасныя культуры заўсёды лічылі гісторыі магічнымі – і небяспечнымі – па адной прычыне: таму што можна выслухаць гісторыю і, на яе заканчэнне, стаць цалкам іншай асобай”, - дадаў Святы Айцец.
Трэці аспект, на які звярнуў увагу Папа – гэта спагада, “адна з характарыстык стыля Бога, разам з блізкасцю і ласкавасцю”. Расповеды пра спагаду з’яўляюцца “закваскай ператварэння для будучыні”, як напрыклад гісторыя Добрага самараніна, якая перамяніла жыццё многіх людзей і грамадстваў, лічыць Пантыфік.
Францішак працытаваў выказванне аднаго з аўтараў кнігі, які назваў “Езуса “Месіяй расказчыкам”, на першы погляд бяззбройным, але на самой справе, валодаючым моцнай зброяй расповеду”. Іншы пісаў, што “расповед, гэта адзін з самых магутных сродкаў, якім валодаем, каб змяніць наш свет”, а таксама важны элемент дэмакратыі, бо ён дае магчымасць выказацца, выслухаць, пераадолець межы і стэрэатыпы. Яшчэ адзін аўтар кнігі падкрэсліваў, што “слова – гэта мост”, а праз “расповед мы можам скараціць дыстанцыю, якая адзяляе нас”, а гэта як ніколі патрэбна ў наш час, - зазначыў Святы Айцец.
