Папа: пакутую і плачу, думаючы пра цярпенні ўкраінскага народа
Аляксандр Панчанка – Vatican News
“Сёння пачынаецца месяц, прысвечаны Маці Божай. Я б хацеў заахвоціць усіх вернікаў і ўсе супольнасці штодзённа маліцца Ружанец у інтэнцыі міру. Мае думкі адразу скіроўваюцца да ўкраінскага гораду Марыупаль, “гораду Марыі”, па-варварску разбомбленага і разбуранага. Тут і зараз я зноў прашу стварыць бяспечныя гуманітарныя калідоры для людзей, якія апынуліся ў пастцы на сталеліцейным заводзе гэтага горада. Пакутую і плачу, думаючы пра цярпенні ўкраінскага народа, асабліва самых слабых, пажылых і непаўналетніх. Нават прыходзяць жахлівыя паведамленні пра выгнаных і дэпартаваных дзяцей”, - сказаў Папа.
“І ў той час як мы з’яўляемся сведкамі жудаснага заняпаду чалавецтва, я пытаюся, разам з мноствам людзей, ахопленых трывогай: ці сапраўды адбываецца пошук міру; ці ёсць жаданне пазбегнуць далейшай ваеннай і вербальнай эскалацыі; ці робіцца ўсё магчымае для таго, каб змоўкла зброя. Прашу вас не скарацца перад логікай насілля, вычварнай спіраллю ўзбраенняў. Паўстанем на шлях дыялогу і міру! Памолімся за гэта”, - сказаў Папа, пасля чаго на ватыканскай плошчы запанавала малітоўная цішыня.
