Святы Айцец: шлях да адзінства патрабуе абмену дарамі
Аляксандр Панчанка – Vatican News
Спасылаючыся на назву сумеснай дэкларацыі “Ісці разам па шляху” (Walking Together on the Way), выдадзенай Камісіяй у маі 2017 года, Пантыфік заўважыў, што ісці разам, значыць “пакінуць тое, што раздзяляе” і “трымаць позірк на Езусе і на мэце, якой Ён прагне і якую ўказвае нам: мэце бачнага адзінства паміж намі”. “Гэта адзінства, якое павінна быць прынята з пакорай, як ласка Духа, і якое трэба развіваць на шляху, узаемна падтрымліваючы адзін аднаго”, - дадаў Святы Айцец.
Францішак падкрэсліў, што “экуменічны дыялог – гэта шлях”, а значыць нешта “нашмат большае, чым проста сумесныя размовы”: гаворка ідзе пра тое, каб “знаёміцца асабіста, і не толькі праз кнігі; мець агульныя мэты і цяжкасці; пэцкаць рукі, разам дапамагаючы параненым братам і сёстрам, выкінутым на ўзбочыны дарог свету; сузіраць адзіным позіркам і сумесна ахоўваць стварэнне, якое акружае нас; падтрымліваць у цяжкасцях дарогі”.
Папа нагадаў пра сінадальны шлях, які пачаўся ў Каталіцкім Касцёле, выказваючы пажаданне, каб Англіканская Царква зрабіла свой унёсак у рамках гэтага працэсу. “Мы ўспрымаем вас як каштоўных спадарожнікаў”, - запэўніў Пантыфік.
Святы Айцец заўважыў, што важным этапам сумеснага шляху англікан і католікаў стане падарожжа ў Паўднёвы Судан, якое ён здзейсніць разам з Архіепіскапам Кентэрберыйскім Джасцінам Уэлбі і Мадэратарам Царквы Шатландыі Джымам Уолесам.
Пантыфік зазначыў, што “ўсялякі пошук больш глыбокага адзінства, не можа не быць абменам дарамі”, які патрабуе пакоры і праўды. “Гэта першы крок: не клапаціцца пра тое, каб выглядаць прыгожа і бяспечна перад братам”, але “з адкрытым сэрцам паказаць яму тое, кім з’яўляемся на самой справе”.
“Грахі, якія прывялі да нашых гістарычных падзелаў, могуць быць пераадолены выключна ў пакоры і праўдзе, пачынаючы ад адчування болю за ўзаемныя раны і патрэбы ў тым, каб дарыць і прымаць прабачэнне”, - сказаў Папа, падкрэсліваючы, што “кожны сапраўдны дар прадугледжвае самаадрачэнне, патрабуе празрыстасці і адвагі, здольнасці адкрывацца на прабачэнне”. “Толькі так можа ўвайсці ў сугучча са Святым Духам, Божым дарам, Тым, які дорыць сябе нам, каб аднавіць гармонію, бо сам з’яўляецца гармоніяй, якая ў адзінстве прымірае адметнасці”, -дадаў ён.
Пантыфік падкрэсліў, што дары Святога Духа ніколі не прызначаюцца для “экслюзіўнага карыстання тымі, хто іх прымае”, але з’яўляюцца “благаслаўленнямі для ўсяго Божага народа”. “У абмене дарамі мы пазнаём, што не можам быць самадастатковымі, без ласкі, дадзенай іншым”, - сказаў Папа на завяршэнне прамовы.
