Святы Пасад правядзе Тыдзень Laudato si’

22-29 мая 2022 года пройдзе Тыдзень Laudato si’, арганізаваны Дыкастэрыяй па служэнні інтэгральнаму развіццю чалавека з нагоды 7-й гадавіны “экалагічнай” энцыклікі папы Францішка.

Аляксандр Панчанка – Vatican News

У цэнтры ініцыятывы будуць знаходзіцца сем мэтаў, акрэсленых у энцыкліцы Laudato si’, і дасягненню якіх дапамагае Платформа ініцыятыў Laudato si’, заснаваная для “стварэння крытычнай сацыяльнай масы і абароны нашага супольнага дому”. Да іх адносіцца адказ на крык планеты і бедных, спрыянне экалагічнай эканоміцы, прыняцце больш устойлівага ладу жыцця, выхаванне і духоўнасць, больш уважлівыя да экалагічных праблем, а таксама падтрымка мясцовых супольнасцей у абароне іх экасістэм.

Кожны дзень на працягу Тыдня Laudato si’ Дыкастэрыя па служэнні інтэгральнаму развіццю чалавека будзе праводзіць адмысловыя анлайн-сустрэчы, прысвечаныя гэтым тэмам. Іх удзельнікі падсумуюць зробленае на працягу сямі гадоў ад дня публікацыі папскай энцыклікі, а таксама паразважаюць над умацаваннем намаганняў з дапамогай Платформы ініцыятыў Laudato si’.

Гаворка будзе весціся пра тое, які ўклад католікі могуць зрабіць у барацьбу з заняпадам біяразнастайнасці; пра ролю выкапнёвага паліва ў канфліктах і кліматычным крызісе; пра прыняцце бедных у наша штодзённым жыцці. Завершыцца ініцыятыва супольнай малітвай, якая адбудзецца вечарам 29 мая. Усе падзеі ў рамках Тыдня будуць трансліравацца на каналах Руху Laudato si’ у Facebook і YouTube.