Францішак благаславіць паліі для новых арцыбіскупаў-мітрапалітаў

20 чэрвеня 2022 года Зала Друку Апостальскай Сталіцы паінфармавала, што Святы Айцец благаславіць паліі для арцыбіскупаў-мітрапалітаў, прызначаных на працягу апошніх дванаццаці месяцаў.

Аляксандр Панчанка – Vatican News

“У сераду 29 чэрвеня 2022 года, ва ўрачыстасць святых апосталаў Пятра і Паўла, у 9.30 у базыліцы святога Пятра, Святы Айцец Францішак благаславіць паліі, прызначаныя для новых арцыбіскупаў-мітрапалітаў, і ўзначаліць эўхарыстычную цэлебрацыю”, - гаворыцца ў ватыканскім паведамленні.

З 2015 года Папа больш не накладае паліі новым арцыбіскупам-мітрапалітам, як гэта адбывалася раней. Згодна з рашэннем Францішка, гэты абрад здзяйсняюць Апостальскія нунцыі ў дыяцэзіях, дзе служаць новапрызначаныя іерархі. У Рыме Пантыфік толькі ўручае ім гэты сімвалічны атрыбут біскупскага літургічнага адзення. Цырымонія па традыцыі праходзіць ва ўрачыстасць святых Пятра і Паўла. Перад ёй паліі ўскладаюцца на магілу святога Пятра ў гротах ватыканскай базылікі. Сёлета палій атрымае арцыбіскуп Юзаф Станеўскі, Мітрапаліт Мінска-Магілёўскі.