Пантыфік: кожны павінен рабіць свой уклад у місію Касцёла
Аляксандр Панчанка – Vatican News
29 чэрвеня 2022 года ў ватыканскай базыліцы адбылася Эўхарыстыя з нагоды ўрачыстасці святых апосталаў Пятра і Паўла. Цэлебрацыю ўзначаліў кардынал Джавані Батыста Рэ, дэкан Калегіі кардыналаў. Падчас літургіі Пантыфік благаславіў паліі для 44-х арцыбіскупаў-мітрапалітаў, прызначаных на працягу апошніх дванаццаці месяцаў, у тым ліку для арцыбіскупа Юзафа Станеўскага, Мітрапаліта Мінска-Магілёўскага, а таксама прамовіў гамілію.
Францішак спаслаўся на літургічнае чытанне пра цудоўнае вызваленне апостала Пятра з вязніцы і на словы анёл Пана, скіраваныя да яго: “Уставай хутчэй!” (Дз 12,7). На думку Пантыфіка, хрысціянская супольнасць таксама паклікана “хутка ўстаць, каб увайсці ў дынаміку ўваскрасення і дазволіць Пану весці сябе па шляхах, якія Ён хоча ўказаць”.
Папа заклікаў “кінуць позірк у кірунку новых гарызонтаў, адкрытага мора”, не быць “зняволенымі ў вязніцы прызвычаенасцяў, спалоханымі пераменамі і прывязанымі да ланцугу нашых звычаяў”, бо гэта вядзе да “духоўнай пасрэднасці” і гасіць місійны запал. Такім чынам вера можа ператварыцца ў фармалізм, рэлігію цырымоній і абрадаў, знешніх аздабленняў і вульгарных суцяшэнняў, - папярэдзіў Святы Айцец.
“Сінод, які перажываем, кліча нас стаць Касцёлам, які ўстае, а не замыкаецца ў сабе, які здольны глядзець шырэй, выйсці з уласных вязніц, каб ісці насустрач свету”, - сказаў Пантыфік.
Каментуючы словы апостала Паўла, які падсумоўваючы сваё жыццё, сказаў, што “змагаўся ў добрай барацьбе” (2 Цім 4,7), Святы Айцец нагадаў, што кожны ў Касцёле пакліканы станавіцца місійным вучнем: не быць пасіўным гледачом, а рабіць свой уклад. “Сінадальны Касцёл значыць: удзельнічаюць усе, ніхто не займае месца іншых і ніхто не знаходзіцца па-над іншымі”, - дадаў ён.
Францішак заўважыў, што абвяшчэнне Евангелля – гэта сапраўдная барацьба, бо яно не прадугледжвае кампрамісу з логікай свету, але запальвае агонь Божага Валадарства там, дзе пануюць чалавечыя механізмы ўлады, зла, насілля, карупцыі, несправядлівасці, маргіналізацыі. Папа заклікаў “не замыкацца ў нашых касцёльных колах і не прывязвацца да нашых бясплённых дыскусій”, але дапамагаць адно аднаму станавіцца закваскай у свеце.
“Разам мы можам і павінны клапаціцца пра чалавечае жыццё, пра ахову стварэння, пра годнасць працы, пра праблемы сям’і, пра цяжкую сітуацыю пажылых і пакінутых, бежанцаў і тых, хто ўпаў у роспач. Адным словам, мы павінны быць Касцёлам, які прасоўвае культуру клопату, спачування да слабых і барацьбы супраць усіх форм дэградацыі, у тым ліку нашых гарадоў і месцаў, якія адведваем, каб радасць Евангелля заззяла ў жыцці кожнага: гэта наша “добрая барацьба”, - сказаў Папа.
Напрыканцы гаміліі Францішак прывітаў новых арцыбіскупаў-мітрапалітаў, а таксама дэлегацыю Канстантынопальскага Патрыярхату, заклікаючы “крочыць разам”, бо толькі разам “можам быць зернем Евангелля і сведкамі братэрства”.
