Пантыфік у Пяцідзясятніцу: Дух Святы з’яўляецца памяццю Бога
Аляксандр Амяльчэня - Vatican News
Святы Айцец падкрэсліў, што ў цэнтры духоўнага жыцця знаходзіцца любоў, дар Духа Святога, Які вучыць чалавека любіць і прымушае яго адчуваць сябе любімым. Ён “будзіць” нашае духоўнае жыццё, нагадвае Божае слова, таму што з’яўляецца памяццю Бога. Папа заклікаў вернікаў дазволіць Духу Святому ўвайсці ў самыя складаныя сітуацыі, даць магчымасць нагадваць пра Божую любоў.
“Такім чынам ён наводзіць парадак у нашым жыцці: вучыць прымаць сябе, прабачаць сябе, мірыцца з мінулым. Пачаць усё спачатку”, - адзначыў Францішак.
Папа падкрэсліў, што Дух Святы перад жыццёвым скрыжаваннем падказвае лепшы шлях. Таму важна ўмець адрозніваць Яго голас ад голасу злога. Менавіта Божы Дух выпраўляе нас, заклікае да перамен, вучыць змагацца з нашай хлуснёй і двудушнасцю.
“Дух Святы, Які напраўляе цябе на шляху, ніколі не пакідае на волю лёсу, але бярэ за руку, суцяшае і заўсёды падбадзёрвае”, - падкрэсліў Святы Айцец.
Францішак зазначыў, што Дух Святы запрашае нас ніколі не губляць упэўненасці і заўсёды пачынаць усё спачатку, браць на сябе абавязацельства несці надзею і радасць усім, каго сустракаем, не скардзіцца. Ён дадаў, што Суцяшальнік заўсёды застаецца канкрэтным: Ён хоча, каб мы засяродзіліся на тым, што адбываецца тут і цяпер, таму што месца, дзе мы знаходзімся, і час, у якім мы жывём, – гэта прастора ласкі.
Пантыфік таксама падкрэсліў ролю Духа Святога як стваральніка супольнасці і натхняльніка евангелізацыі. “Давайце пойдзем у школу Духа Святога, каб Ён навучыў нас усяму. Будзем маліцца да Яго кожны дзень, каб нагадваў нам, што мы заўсёды пачынаем з Божага позірку на нас, што ў сваім выбары мы кіруемся слуханнем Яго голасу, што мы крочым разам як Касцёл, успрымальны да Яго і адкрыты для свету”, - заахвоціў Францішак напрыканцы сваёй гаміліі.
